२०८३ मंसिर २ गते बुधवार
काठमाडौं । नेकपा (एमाले) को राष्ट्रिय भेला केहीबेरमा उद्घाटन हुँदैछ । भेलामा सहभागी प्रतिनिधिहरू यतिखेर भेलास्थल कार्की बेङ्क्वेट थापाथली हाइटमा जुट्दै छन् ।
देशभरबाट ३४ सय १४ प्रतिनिधिहरू सहभागी हुँदै छन् । अध्यक्ष केपी शर्मा ओली उद्घाटनका लागि राष्ट्रिय भेला उद्घाटन समारोहस्थल पुगेका छन् । भेलामा सहभागीहरूको हाजिरी र परिचयपत्र वितरण धमाधम भइरहेको छ ।
भेलामा पुराना वामपन्थी नेताहरू मोहनचन्द्र अधिकारी, वाचश्पति देवकोटा, हरिचरण सिवाकोटी र विजयलाल श्रेष्ठ सहभागी छन् । विजयलाल नेकपा संस्थापक महासचिव पुष्पलालको भाइ हुन् ।
राष्ट्रिय राजनीतिलाई स्पष्ट दिशा निर्देश गर्न र स्थानीय तहको निर्वाचनको पूर्वतयारीका लागि भेला आयोजना गरिएको हो । पार्टी जीवनमा स्थानीय कमिटी तहदेखि केन्द्रीय कमिटी, संसददेखि पालिकासम्मका प्रतिनिधिसहितको यो पहिलो भेला हो ।
भेलालाई पार्टी अध्यक्ष केपी शर्मा ओलीले उद्घाटन सहित विशेष सम्बोधन गर्नु हुने छ । त्यसैगरी वरिष्ठ नेता तथा सम्माननीय पूर्वराष्ट्रपति विद्यादेवी भण्डारीको सम्बोधन हुनेछ । वरिष्ठ नेता भण्डारी पार्टीमा औपचारिक पुनरागमन पछि पहिलो र विशेष सम्बोधन हुनेछ ।
© 2026 All right reserved to khabarcnter.com | Site By : Sobij