२०८३ कार्तिक २५ गते बुधवार
२०८३ कार्तिक २५ गते बुधवार
.gif)
बलिउडको बहुप्रतीक्षित फिल्म 'रामायण'ले नेपाली बक्स अफिसमा उत्साहजनक व्यापार गरेको छ। नेपालसहित विश्वभर एकसाथ प्रदर्शनमा आएको फिल्मले पहिलो चार दिनमै नेपालमा झन्डै ८ करोड रूपैयाँ ग्रस कलेक्सन गरेको हो।
चलचित्र विकास बोर्डको बक्स अफिस स्रोतले दिएको जानकारी अनुसार आइतबार रातिसम्म ‘रामायण’ले नेपालमा ७ करोड ८० लाख रूपैयाँ हाराहारी ग्रस कलेक्सन गरेको छ। यस अवधिमा १ लाख ८४ हजार हाराहारी टिकट बिक्री भएका छन्।
फिल्मले सोमबार र मंगलबार पनि दर्शकको राम्रो साथ पाइरहेको छ। यी दुई दिनमा पनि हलमा दर्शक अकुपेन्सी उच्च देखिएको छ।
भारतमा पनि फिल्मले बलियो व्यापार गरिरहेको छ। फिल्मले पाँच दिनमा भारतबाट मात्रै ३४६.३५ करोड भारू नेट कलेक्सन गरेको छ। भारतमा यसको कुल ग्रस कलेक्सन ४१३.९० करोड भारू पुगेको भारतीय संचारमाध्यमले जनाएका छन्।
विश्वव्यापी बक्स अफिसमा पनि 'रामायण'ले प्रभावशाली व्यापार गरेको छ। प्रदर्शनको पाँच दिनमा फिल्मले विश्वभरबाट ६६३.९० करोड भारू ग्रस कलेक्सन गरेको भारतीय बक्स अफिस ट्रयाकर स्याकनिल्कले उल्लेख गरेको छ। यसमध्ये भारतबाट ४१३.९० करोड र भारतबाहिरका बजारबाट २५० करोड भारू संकलन भएको हो।
नितेश तिवारी निर्देशित 'रामायण' नोभेम्बर ५ (कात्तिक १९) देखि विश्वभर एकसाथ प्रदर्शनमा आएको हो।
फिल्ममा रणवीर कपूरले राम, यशले रावण, साई पल्लवीले सीता, सनी देओलले हनुमान र रवि दुबेले लक्ष्मणको भूमिका निर्वाह गरेका छन्।
© 2026 All right reserved to khabarcnter.com | Site By : Sobij
