२०८३ भाद्र ८ गते सोमवार
२०८३ भाद्र ८ गते सोमवार
.gif)
काठमाडौं । कोशी प्रदेशका मुख्यमन्त्री हिक्मतकुमार कार्कीले आज प्रदेशसभाबाट विश्वासको मत लिँदैछन् । विश्वासको मत लिनुअघि नेकपा एमाले कोशी प्रदेश संसदीय दलले आफ्ना सांसदलाई अनिवार्य उपस्थित हुन र मुख्यमन्त्रीको पक्षमा मतदान गर्न ह्विप जारी गर्ने निर्णय गरेको छ ।
प्रदेशसभा सचिवालयमा सोमबार बिहान बसेको एमाले संसदीय दलको बैठकले यस्तो निर्णय गरेको दलका सचेतक रमेशकुमार बस्नेतले जानकारी दिए ।
मुख्यमन्त्री कार्कीले आज दिउँसो २ बजे बस्ने प्रदेशसभा बैठकमा तेस्रो पटक विश्वासको मत लिन लागेका हुन् ।
एमाले र नेपाली कम्युनिस्ट पार्टी (नेकपा) बीच भएको तीनबुँदे सहमतिअनुसार प्रदेश सरकारमा नयाँ गठबन्धन बनेपछि कांग्रेसले मुख्यमन्त्री कार्कीलाई दिएको समर्थन फिर्ता लिएको थियो । कांग्रेसले भदौ ३ गते समर्थन फिर्ताको पत्र प्रदेशसभा सचिवालयमा दर्ता गराएको थियो ।
संविधानको धारा १६८ (५) अनुसार २०८१ वैशाख २७ गते मुख्यमन्त्री नियुक्त भएका कार्कीले यसअघि दुई पटक विश्वासको मत लिइसकेका छन् । पहिलो पटक २०८१ वैशाख ३१ गते विश्वासको मत लिँदा उपस्थित ६२ सांसदमध्ये ५७ जनाले उनको पक्षमा मतदान गरेका थिए ।
त्यसपछि एमाले–माओवादी गठबन्धन परिवर्तन भएर कांग्रेससँग सहकार्य भएपछि २०८१ असोज २ गते दोस्रो पटक विश्वासको मत लिएका थिए । उक्त मतदानमा कार्कीको पक्षमा ६६ र विपक्षमा १५ मत परेको थियो ।
९२ सदस्यीय कोशी प्रदेशसभामा एमालेका ४०, नेपाली कांग्रेसका २९, नेकपाका १७, राष्ट्रिय प्रजातन्त्र पार्टीका ५ र जनता समाजवादी पार्टीका १ सांसद रहेका छन् । आजको विश्वासको मत परीक्षणमा सत्ता गठबन्धनको समर्थन निर्णायक देखिएको छ ।
© 2026 All right reserved to khabarcnter.com | Site By : Sobij
