२०८३ कार्तिक ३० गते सोमवार
काठमाडौं । नेपाली कांग्रेसले वरिष्ठ उपसभापतिको काम, कर्तव्य र अधिकार स्पष्ट पारेको छ । पार्टीको १५औँ महाधिवेशनबाट थप गरिएको वरिष्ठ उपसभापति पदका लागि विधान संशोधन गर्दै चारवटा जिम्मेवारी तोकिएको हो ।
यसअघि कांग्रेसको विधानमा वरिष्ठ उपसभापतिको काम, कर्तव्य र अधिकारबारे स्पष्ट व्यवस्था थिएन । संशोधित विधानमा नयाँ धारा ‘२६क’ थप गरी उक्त पदको जिम्मेवारी निर्धारण गरिएको छ ।
नयाँ व्यवस्थाअनुसार केन्द्रीय सभापतिको अनुपस्थितिमा कार्यवाहक सभापतिको रूपमा काम गर्ने, केन्द्रीय नीति, अनुसन्धान तथा प्रशिक्षण प्रतिष्ठानको प्रमुखका रूपमा कार्य गर्ने र केन्द्रीय कार्यालयको संयोजन गर्ने जिम्मेवारी वरिष्ठ उपसभापतिलाई दिइएको छ ।
त्यस्तै, विधानमा तोकिएबमोजिम अन्य काम, कर्तव्य र अधिकारसमेत वरिष्ठ उपसभापतिले प्रयोग गर्न पाउने व्यवस्था गरिएको छ ।
हाल नेपाली कांग्रेसको वरिष्ठ उपसभापतिको जिम्मेवारीमा विश्वप्रकाश शर्मा रहेका छन् ।

© 2026 All right reserved to khabarcnter.com | Site By : Sobij