२०८२ चैत्र ३० गते सोमवार
२०८२ चैत्र ३० गते सोमवार
काठमाडौं । पूर्वराजा ज्ञानेन्द्र शाहले राज्य सञ्चालनको गतिविधिमा युवा पुस्ताको बढ्दो संलग्नताप्रति सकारात्मक सुनिएका छन्। विगतमा राजनीतिक दलहरूको कार्यशैलीप्रति निकै आक्रामक देखिने गरेका पूर्वराजा यस पटक भने बालेन शाह नेतृत्वको सरकार र नयाँ पुस्ताको उदयप्रति नरम र आशावादी सुनिएका हुन् ।
सोमबार नयाँ वर्ष २०८३ को पूर्वसन्ध्यामा भिडियोमार्फत शुभकामना सन्देश दिएका शाहले राजनीति र राज्य सञ्चालनमा युवाहरूको सहभागितालाई ‘उत्साहको विषय’ भन्दै यसले राष्ट्रलाई नयाँ दिशा दिने विश्वास व्यक्त गरेका हुन् ।
उनले भिडियो सन्देशमा भनेका छन्, ‘पढेलेखेका, देश बुझेका र आधुनिक प्रविधिको ज्ञान भएका उत्साहित पात्रहरूको आगमनले राष्ट्रलाई फलदायी बनाउन मद्दत पुग्छ,’।
विगतका राजनीतिक परिवर्तनहरू केबल सतहु मात्र भएको र दलीय खिचातानीले गर्दा देश प्रयोगशाला मात्र बनेको टिप्पणी उनले गर्ने गरेका थिए । तर, वर्तमान सन्दर्भमा युवाहरूको नेतृत्वले राष्ट्रिय समृद्धिमा योगदान पुर्याउने अपेक्षा गर्दै उनले नयाँ सरकारलाई केही महत्त्वपूर्ण सुझावहरू समेत दिएका छन् ।
पूर्वराजाले आर्थिक अवस्थालाई उकास्न, छिमेकी र बाह्य मित्र राष्ट्रहरूसँगको सम्बन्ध सुदृढ बनाउन र आन्तरिक सुरक्षा व्यवस्थालाई चुस्त राख्न नयाँ नेतृत्वलाई सुझाव दिएका छन्। उनले परनिर्भरता र पराधीनताबाट देशलाई जोगाउन हरेक क्षेत्रमा आत्मनिर्भर र स्वाधीन बन्नुपर्नेमा जोड दिएका छन् ।
पूर्वराजाले आपसी रिसराग र प्रतिशोधको राजनीति त्यागेर जनचाहना अनुसार अघि बढ्न आग्रह समेत गरेका छन् । युवा पुस्ताप्रति आशावादी देखिएका उनले सबै नेपालीले न्याय, शान्ति र सुख पाउने अभिलाषा व्यक्त गर्दै देशको मौलिक पहिचान जोगाउनु नै अहिलेको मुख्य दायित्व भएको बताएका छन् ।
© 2026 All right reserved to khabarcnter.com | Site By : Sobij
