१. सुध्रिनसके काँग्रेसले कसैको वैशाखी टेक्नुपर्दैनः काँग्रेस नेता केसी

नेपाली काँग्रेसका नेता अर्जुननरसिंह केसीले सुध्रिनसके नेपाली काँग्रेसले कसैको वैशाखी टेक्न जरुरी नरहेको बताउनुभएको छ । आईतवार पार्टी केन्द्रिय कार्यालयमा सञ्चारकर्मीहरुसँग कुरा गर्दै उहाँले यस्तो बताउनुभएको हो । उहाँले काँग्रेस सुध्रिन नसके चारैतिर चुनौति नै चुनौति रहेको टिप्पणी गर्नुभयो । उहाँले सुध्रिएर जनतामाझ जानसके तल्लोेस्तरसम्म संगठन भएको काँग्रेसलाई कसैको वैशाखी टेक्न जरुरी नरहेको बताउनु भयो । काँग्रेस आफैँ लोकतन्त्रको संरक्षक, संवाहक भएको जिकिर गर्नुभयो । उहाँले भन्नुभयो, ‘हामी सुध्रिएनौँ भने त चारैतिर चुनौति नै चुनौति छ । हामी सुध्रियौँ भने गाउँगाउँसम्म संगठन छ, इतिहासमा गरेका योगदान, विकासका कुराहरुलाई अब सुधार गर्छौं भनेर जाँदा जुनसुकै शक्ति आएपनि काँग्रेसले कसैको वैशाखी टेकेर हिँड्नुपर्दैन । काँग्रेस आफैँ लोकतन्त्रको संरक्षक, संवाहक हो ।’

२. रवि–बालेनलक्षित काँग्रेस नेता राठौरको टिप्पणीः सहकारी ठग र गँजेडीहरुले देश चलाउन सक्दैनन्

नेपाली काँग्रेसका नेता किशोर सिंह राठौरले १० वर्ष पार्टी चलाएर देखाउन नयाँ राजनीतिक दलहरुलाई चुनौति दिनुभएको छ । आईतवार पार्टी केन्द्रिय कार्यालयमा सञ्चारकर्मीहरुसँगको कुराकानीमा उहाँले यस्तो चुनौति दिनुभएको हो । उहाँले केही वर्षअघि मात्रै खुलेका जनमत, राष्ट्रिय स्वतन्त्र पार्टी, नागरिक उन्मुक्ति पार्टीहरुको उदाहरण दिँदै १० वर्ष राम्रोसँग पार्टी चलाएर देखाउन चुनौति दिनुभयो । उहाँले नेपाली काँग्रेस, नेकपा एमाले लगायतका राजनीतिक दलहरुले जनताको अधिकार, विकास दिएको बताउनु हुँदै सहकारी ठग र गँजेडीहरुले देश चलाउन नसक्ने टिप्पणी गर्नुभयो । 

३. रवि–बालेनको सहमतिलाई अनौठो मान्नु पर्दैनः धनराज गुरुङ

नेपाली काँग्रेसका उपसभापति धनराज गुरुङले राष्ट्रिय स्वतन्त्र पार्टी र काठमाडौं महानगरपालिकाका प्रमुख बालेन्द्र साहबीचको मिलन कुनै अनौठो नभएको बताउनुभएको छ । पार्टी केन्द्रिय कार्यालय सानेपामा सञ्चारकर्मीहरुसँगको कुराकानीमा उहाँले यस्तो टिप्पणी गर्नुभएको हो । उहाँले रास्वपा सभापति रवि लामिछाने र साहबीचको सहमति राजनीतिमा कुनै अनौठो नरहेको बताउनु भयो । उहाँले राजनीतिमा कोको जुट्छन् र कोको फुट्छन् भन्नेकुरा काँग्रेसलाई चासोको विषयको नभएको बताउनु भयो । उहाँले राजनीतिमा फुट्ने र जुट्ने भइरहने भएकाले अनौठो मान्न नहुने बताउनु भयो । राजनीतिमा सबैखाले चुनौति आउने भन्दै हरेक चुनौतिको सामना गरेर आएको काँग्रेसले यसलाई गम्भीर रुपमा लिन आवश्यक नरहेको बताउनु भयो । 

४. भदौ २३ को जेन–जी आन्दोलनको स्मरणमा ‘नदबिने आवाज’ सामुहिक कला प्रदर्शनी

गत भदौ २३ गते भएको जेन–जी युवा आन्दोलन र अभिव्यक्ति स्वतन्त्रताको समर्थनमा सामुहिक कला प्रदर्शनी ‘नदबिने आवाज’ आयोजना भएको छ । प्रदर्शनी अन्तर्राष्ट्रिय सम्मेलन केन्द्र (संसद भवन) अगाडिको सडक पेटीमा आयोजना गरिएको हो । प्रदर्शनीमा आन्दोलनका क्रममा ज्यान गुमाएका युवाहरूको स्मृति, सुशासनको माग र अभिव्यक्ति स्वतन्त्रताको पक्षमा विभिन्न कलाकृति प्रदर्शित गरेका छन् । गत भदौ २३ र २४ गते भ्रष्टाचार र बेथितिविरुद्ध शुरु भएको जेन–जी युवा आन्दोलनले देशमा ठूलो राजनीतिक परिवर्तन ल्याएको थियो । आन्दोलनका क्रममा दर्जनौँ युवाले ज्यान गुमाएका थिए भने सयौँ घाइते भएका थिए ।

५. नेपाल र चीनबीचको सम्बन्ध अझै सुदृढ बनाउनुपर्छः उपसभामुख राना

प्रतिनिधि सभाका उपसभामुख इन्दिरा रानाले नेपाल र चीनबीचको सम्बन्ध आपसी सम्मान र समझदारीमा आधारित रहेको बताउँदै यसलाई अझ सुदृढ बनाउनुपर्नेमा जोड दिनुभएको छ । नेपाल र चीनबीच कुटनीतिक सम्बन्ध स्थापना भएको ७० औँ वर्ष प्रवेशको अवसरमा वर्षभर आयोजित विविध कार्यक्रमहरूको समापनका सन्दर्भमा चिनियाँ दुतावासद्वारा आयोजित विशेष स्वागत समारोहमा उहाँले यस्तो धारणा राख्नुभएको हो । समारोहलाई सम्बोधन गर्दै उपसभामुख रानाले दुई देशबीचको सम्बन्ध सरकारी स्तरमा मात्र सिमित हुनु नहुने भन्दै जनस्तरमा पनि विस्तार हुनुपर्ने बताउनु भयो । 

६. काँग्रेसले समानुपातिक सूचि सोमवार आयोगमा बुझाउने

नेपाली काँग्रेसले आगामी प्रतिनिधि सभा सदस्यका लागि समानुपातिक सूचि सोमवार निर्वाचन आयोगमा बुझाउने भएको छ । आईतवार सानेपामा सञ्चारकर्मीहरुसँग कुरा गर्दै पार्टीका प्रवक्ता डा. प्रकाशशरण महतले यसबारे जानकारी गराउनुभएको हो । केन्द्रिय कार्यसमितिको बैठकमा सात प्रदेशकै केन्द्रिय कार्य सम्पादन समितिमा रहनुभएका नेताहरुसँग छलफल भइरहेको र अब सूचि तयार गरेर सोमवारसम्म आयोगलाई बुझाउने बताउनु भयो । समानुपातिक सूचिबाट १ सय १० जना सांसदहरु चयन हुने भएकाले समानुपातिक सूचि तयार पार्नु पनि महत्वपूर्ण काम भएको बताउनु भयो । 

७. एमाले सचिवालय बैठक शुरु

नेकपा (एमाले) को ११ औँ राष्ट्रिय महाधिवेशनपछि पहिलो सचिवालय बैठक शुरु भएको छ । ललितपुरको च्यासलस्थित पार्टी केन्द्रिय कार्यालयमा बैठक शुरु भएको हो । बैठकमा मुख्य रूपमा आगामी प्रतिनिधि सभा निर्वाचनका लागि समानुपातिकतर्फका उम्मेदवारहरूको बन्दसूचि अन्तिम रूप दिने एजेण्डा रहेको छ । निर्वाचन आयोगले समानुपातिक उम्मेदवारको बन्दसूचि बुझाउने अन्तिम मिति आज नै तोकेकाले बैठकले यसलाई प्राथमिकतामा राखेर छलफल गरिरहेको पार्टी स्रोतले जनाएको छ । जिल्ला र प्रदेश तहबाट सिफारिस भएका नामहरूको आधारमा छोटो सूची तयार पारिएको र आजको बैठकबाट अन्तिम निर्णय गरी आयोगमा बुझाउने तयारी छ ।

८. एनएसजेएफ पल्सर स्पोटर््स अवार्ड पुस २३ गते पोखरामै

नेपाली खेलकुदको प्रतिष्ठित एनएसजेएफ पल्सर स्पोटर््स अवार्डको २२ औं संस्करण पुस २३ गते पोखरामा आयोजना हुने भएको छ । गत भदौ २९ गते पोखरामा तय अवार्ड जेनजी आन्दोलनका कारण अन्तिम समयमा स्थगित हुन पुगेको थियो । आयोजक नेपाल खेलकुद पत्रकार मञ्च (एनएसजेएफ) ले काठमाडौंमा आईतवार पत्रकार सम्मेलन आयोजना गर्दै प्रभावित अवार्ड आगामी पुस २३ गते आयोजना गर्ने जनाएको छ । भदौ २३ र २४ गते भएको जेनजी आन्दोलनका कारण अन्तिम समयमा अवार्ड स्थगित हुन पुगेको थियो । खेलकुद पत्रकार मञ्चका अध्यक्ष निरञ्जन अधिकारीले स्पोटर््स हबको रूपमा रहेको पोखरामा नै अवार्ड आयोजना गर्ने लामो समयदेखिको योजनाअनुरूप सरोकारवालासँग छलफल गरेर पोखरामा नै अवार्ड गर्न लागिएको बताए । 

९.‘क्याथल्याव’ र ‘इपिल्याव’ प्रविधिः काठमाडौं मेडिकल कलेजमा आधुनिक हृदय–मस्तिष्क उपचारमा नयाँ युग

काठमाडौं मेडिकल कलेजले क्याथ ल्याव र हालै शुरु भएको इपिल्याव प्रविधिले नेपालमा हृदय तथा मस्तिष्कसम्बन्धी रोगहरूको निदान र उपचारमा क्रान्तिकारी परिवर्तन ल्याएको छ ।  न्युज एजेन्सी नेपालसँगको अन्तर्वार्तामा काठमाडौं मेडिकल कलेजका प्रा.डा. सहदेव ढुङ्गानाले हृदय तथा मस्तिष्कसम्बन्धी जटिल रोगहरूको उपचारमा क्याथ ल्याव र इलेक्ट्रोफिजियोलोजी (इपि) ल्यावले नयाँ युगको शुरुवात गरिरहेको दाबी गर्नुभयो । उहाँकाअनुसार यी प्रविधिहरूले पारम्परिक ओपन हार्ट सर्जरीको विकल्पको रूपमा छोटो समयमै, सुरक्षित, र प्रभावकारी उपचार सम्भव बनाएका छन् ।

१०. एभरेस्ट समिटियर्स समिट हुँदै

एभरेस्ट एलायन्स नेपालले दोस्रो संस्करणको एभरेस्ट समिटियर्स समिट आयोजना गर्ने घोषणा गरेको छ । एभरेस्ट एलायन्सले आईतवार पत्रकार सम्मेलन गरी अन्तर्राष्ट्रिय सगरमाथा दिवसको अवसर पारेर सन् २०२६ मे २७ मा काठमाडौंमा समिट गर्न लागेको जानकारी दिएको हो । उक्त समिट तेन्जिङ नोर्गे शेर्पा र एडमण्ड हिलारीद्वारा गरिएको सगरमाथाको ऐतिहासिक पहिलो आरोहणको स्मरणमा समर्पित रहने एभरेस्ट एलायन्स नेपालकी अध्यक्ष श्रद्धा क्षेत्रीले बताउनु भयो । दिगो भविष्यको लागि हिमालयन इनोभेसन भन्ने नाराका आयोजना हुने समिटमा विश्वभरका सगरमाथा आरोही, नीति निर्माता, पर्वतारोहण संस्थाका प्रतिनिधि, संरक्षण अभियन्ता, पर्यटन व्यवसायी, अनुसन्धानकर्ता तथा अन्तर्राष्ट्रिय साझेदारहरूको सहभागिता रहनेछ । 

११. एमाले नेता भन्छन्ः ‘रवी र बालेनको एकताले खासै अर्थ राख्दैन’

नेकपा एमालेका नेताहरुले राष्ट्रिय स्वतन्त्र पार्टी र काठमाडौं महानगरपालिका प्रमुख बालेन साहको एकताले खासै अर्थ नराख्ने बताएका छन् । नेपाल न्युज एजेन्सीसँगको कुराकानीका क्रममा नेताहरुले उनीहरुको एकताको ठूलो असर नदेखिने दाबी गरेका हुन् । नेकपा एमालेका नेता मानवीर राईले राष्ट्रिय स्वतन्त्र पार्टीका सभापति रवि लामिछाने र काठमाडौं महानगरपालिकाका प्रमुख साहको राजनीतिक मिलन वा विमिलनको कुनै विशेष अर्थ नरहेको बताउनु भयो । उनीहरूको राजनीति नेपाली जनतामा आधारित नदेखिएको भन्दै राईले त्यसले वर्तमान नेपाली राजनीतिक परिवेशमा खासै महत्व नपाउने दाबी गर्नुभयो । 

१२. जेन–जी आन्दोलनलाई रास्वपा र मेयर साहले सत्ता स्वार्थको लागि हाइज्याक गर्न खोजेः उपमहासचिव भट्टराई

नेकपा एमालेका उपमहासचिव योगेश भट्टराईले राष्ट्रिय स्वतन्त्र पार्टी (रास्वपा) र काठमाडौ महानगरपालिकाका प्रमुख बालेन्द्र साहबीच भएको एकतालाई अन्यथा लिन नहुने बताउनुभएको छ । नेपाल न्युज एजेन्सीसँगको कुराकानीका क्रममा उहाँले एजेण्डा मिल्दा एकीकरण हुने र नमिल्दा छुट्टिने कुरालाई समान्य रुपमा लिनुपर्ने बताउनु भयो । लोकतान्त्रिक प्रक्रियामा राजनीतिक दलहरु मिल्ने र विभाजन हुने कुरालाई अनौठो मान्न नहुने उहाँको भनाई छ । उहाँले आगामी निर्वाचनलाई लक्षित गरेर रास्वपा र प्रमुख साहले पनि एकताको घोषणा गरेको उल्लेख गर्नुभयो । 

१३. तीन राजनीतिक दलले बुझाए समानुपातिकको बन्द सूचि

फागुन २१ गते तोकिएको प्रतिनिधि सभा निर्वाचनको लागि राजनीतिक दलहरुले निर्वाचन आयोगमा समानुपातिकतर्फको बन्दसूचि बुझाउन थालेका छन् । आयोगकाअनुसार आईतवार दिउँसोसम्म नेपाल मजदुर किसान पार्टी (नेमकिपा) सहित तीन वटा राजनीतिक दलले बन्दसूचि पेश गरेका छन् । तीन वटा राजनीतिक दलहरुले १३४ जनाको बन्दसूचि आयोगमा पेश गरेको आयोगका प्रवक्ता नारायणप्रसाद भट्टराईले जानकारी दिनुभयो । उहाँकाअनुसार आईतवार र सोमवार बन्दसूचि पेश गर्ने समय तोकिएको छ । आयोगले समानुपातिकको बन्दसूचि पेश गर्ने कामलाई दुई चरणमा गरिरहेको जानकारी दिनुभयो । 

१४. चीनद्वारा फेन्युन–४ ०३ उपग्रहको सफल प्रक्षेपण

चीनले शनिवार देशको दक्षिण–पश्चिमी सिचुआन प्रान्तको सिचाङ स्याटेलाइट लन्च सेन्टरबाट अन्तरिक्षमा नयाँ उपग्रह पठाएको छ । फेन्युन–४ ०३ नामक उपग्रहलाई बेइजिङ समयअनुसार १२ः०७ बजे लङ मार्च–३बी रकेटमार्फत प्रक्षेपण गरिएको थियो । यो आफ्नो निर्धारित कक्षमा सफलतापूर्वक प्रवेश गरेको छ । यो लङ मार्च रकेट शृङ्खलाको ६२१औँ उडान मिसन थियो । 

१५. टर्किएबाट शव फिर्ता ल्याइएसँगै लिबियाद्वारा दिवंगत सेना प्रमुखको सम्मान

गत साता टर्किएमा भएको विमान दुर्घटनामा निधन भएका लिबियाली सेना प्रमुख मोहम्मद अल–हद्दाद र उनका साथीहरूको पार्थिव शरीर स्वदेश फिर्ता लगिएको छ । जहाँ उनीहरूलाई राजकीय सम्मानका अन्त्येष्टि गरिएको छ । लिबियाले गत हप्ताको शुरुमा टर्किएमा भएको विमान दुर्घटनामा ज्यान गुमाएका आफ्ना दिवंगत सेना प्रमुख मोहम्मद अल–हद्दाद र उनका सहयोगीहरूको पार्थिव शरीर बुझ्न शनिवार आधिकारिक समारोहको आयोजना गरेको थियो । शवहरूलाई त्रिपोली अन्तर्राष्ट्रिय विमानस्थलमा लगिएको थियो । जहाँ लिबियाको प्रेसिडेन्सियल काउन्सिलका प्रमुख मोहम्मद अल–मेनफी र प्रधानमन्त्री अब्दुल–हामिद दबेइबाह लगायतका वरिष्ठ अधिकारीहरूले प्राप्त गरेका थिए । अल–मेनफीले अल–हद्दादको सेवाको कदर गर्दै उनलाई मरणोपरान्त फिल्ड मार्शल पदमा पदोन्नति गरेका छन् ।

१६. थाइल्याण्ड र कम्बोडियाद्वारा युद्धविराम सम्झौतामा हस्ताक्षर

थाइल्याण्डका रक्षामन्त्री नत्थापोन नाकपानिच र कम्बोडियाका उपप्रधानमन्त्री तथा रक्षा मन्त्री टिया सेइहाले शनिवार थाइल्याण्डको चन्थाबुरी प्रान्तको एक सीमा नाकामा युद्धविराम सम्झौतामा हस्ताक्षर गरेका छन् । कम्बोडियाको सरकारी सञ्चालित राष्ट्रिय टेलिभिजन (टिभिके) ले जनाएअनुसार कम्बोडियाले थाइल्याण्डसँग तत्काल युद्धविराम गर्ने संयुक्त विज्ञप्तिमा हस्ताक्षर गरेको पुष्टि गरेको छ । 

१७. म्यानमारमा २०२५ को आम निर्वाचन शुरु

म्यानमारमा बहुदलीय लोकतान्त्रिक निर्वाचनको पहिलो चरण आईतवारदेखि शुरु भएको छ । पहिलो चरणको मतदानसँगै २०२५ को बहुदलीय लोकतान्त्रिक आम निर्वाचन शुरु भएको हो । यो निर्वाचन तीन चरणमा सम्पन्न हुने तालिका रहेको छ । जसअनुसार दोस्रो चरण २०२६ जनवरी ११ र तेस्रो चरण २०२६ जनवरी २५ मा हुनेछ । यस निर्वाचनमा ५७ राजनीतिक दलका करिव ५ हजार उम्मेदवारहरूले देशभरका ६ सय ९२ निर्वाचन क्षेत्रहरूमा प्रतिष्पर्धा गरिरहेका छन् । यसले संघीय संसदका दुवै सदन र राज्य तथा क्षेत्रीय संसदहरूका लागि प्रतिनिधिहरू चयन गर्नेछ । निर्वाचित संघीय संसदले नयाँ राष्ट्रपति चयन गर्नेछ । जसले आगामी नयाँ संघीय सरकार गठन गर्नेछ । निर्वाचन आयोगकाअनुसार मतदानका लागि देशभर कुल २१ हजार ५ सय १७ मतदान केन्द्रहरू स्थापना गरिएका छन् । 

१८. हतियार निर्यात खुकुलो पार्ने सत्ताधारी गठबन्धनको योजनाविरुद्ध जापानी प्रदर्शनकारीहरूको ¥याली

टोकियोमा जापानी प्रदर्शनकारीहरूले सत्ताधारी गठबन्धनको हतियार निर्यातमा रहेका लामो समयदेखिका प्रतिवन्धहरू खुकुलो पार्ने योजनाको विरोध गरेका छन् । उनीहरूले जापानमा निर्मित हतियारहरूले विश्वव्यापी द्वन्द्व निम्त्याउन सक्ने चिन्ता व्यक्त गरेका छन् । टोकियोस्थित लिबरल डेमोक्रेटिक पार्टीको मुख्यालय अगाडि जापानी प्रदर्शनकारीहरूले हतियार निर्यातमा रहेका प्रतिवन्धहरूलाई उल्लेख्य रूपमा खुकुलो पार्ने सत्ताधारी गठबन्धनको योजनाप्रति विरोध प्रदर्शन गरेका छन् । ¥यालीमा प्रदर्शनकारीहरूले जापानमा निर्मित हतियारहरू नबेच, युद्ध चाहिँदैन र हतियार निर्यातको कडा विरोध गरौं भन्ने नारा लेखिएका प्लेकार्डहरू बोकेका थिए । प्रदर्शनकारीका प्रतिनिधिहरूले एक ज्ञापनपत्र बुझाउँदै पाँच–श्रेणीको प्रतिवन्ध खारेज गर्ने उद्देश्यले भइरहेका सबै कार्यहरू तुरुन्त रोक्न माग गरे । 

१९. रास्वपा–बालेन सम्झौताः संघीयता र धर्मनिरपेक्षताबारे मौन रहेको भन्दै जसपा नेपालको आपत्ति

जनता समाजवादी पार्टी (जसपा) नेपालका नेता मनिष सुमनले राष्ट्रिय स्वतन्त्र पार्टी (रास्वपा) र काठमाडौं महानगरपालिकाका मेयर बालेन्द्र साहबीच भएको सम्झौता स्वभाविक भएपनि संघीयता र धर्मनिरपेक्षता जस्ता आधारभुत विषयहरू नसमेटिएको भन्दै आशंका व्यक्त गर्नुभएको छ । आईतवार जनपुरमा न्युज एजेन्सी नेपालसँग कुरा गर्दै नेता सुमनले यस्तो टिप्पणी गर्नुभएको हो । उहाँले जेन–जी आन्दोलनका माग र यथास्थितिबाट देश परिवर्तन गर्नुपर्ने आम जनताको चाहनाअनुसार दुई शक्तिबीचको सम्झौता स्वभाविक भएको पनि बताउनु भयो । उहाँले रास्वपा सभापति रवि लामिछाने र महानगर प्रमुख शाहले सम्झौतामा संघीयता र धर्म निरपेक्षताको विषय लेख्न लजाएको आरोप पनि लगाउनु भयो । बालेनजस्तो चर्चित व्यक्तित्व रास्वपाको कार्यकर्ता बन्न तयार हुनु रास्वपाका लागि सौभाग्यको विषय भएपनि रास्वपाको नीतिगत ठिक नभएको उहाँको तर्क छ ।

२०. रवि–बालेन सहमतिमा मुलुकलाई निकास दिने ठोस एजेण्डा छैनः राजनीतिक विश्लेषकहरू

राष्ट्रिय स्वतन्त्र पार्टी (रास्वपा) का सभापति रवि लामिछाने र काठमाडौं महानगरपालिकाका मेयर बालेन्द्र शाहबीच हालै भएको सात बुँदे समझदारीमा मुलुकलाई दीर्घकालीन निकास दिने ठोस एजेन्डा नभएको राजनीतिक विश्लेषकहरूले बताएका छन् । त्रिभूवन विश्वविद्यालयको केन्द्रिय द्वन्द्व, शान्ति तथा विकास अध्ययन विभागले आयोजना गरेको एक कार्यक्रममा बोल्दै विश्लेषकहरू डा. इन्द्र अधिकारी, केशव दाहाल, चन्द्रदेव भट्ट र लेखनाथ पाण्डेलगायतले यो सहमति मुख्यतः पपुलिजममा आधारित रहेको र यसले देशलाई वास्तविक निकास दिन नसक्ने तर्क गरेका हुन् । 

२१. एनभिए च्याम्पियनसिपमा हेल्प नेपाल र पुलिस क्वार्टरफाइनलमा

हेल्प नेपाल स्पोटर््स र नेपाल पुलिस क्लवले एनभिए महिला तथा पुरुष भलिबल च्याम्पियनसिपमा पुरुषतर्पm क्वार्टरफाइनलमा स्थान बनाएका छन् । त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा जारी प्रतियोगितामा समूहको दुवै खेल जित्दै हेल्प नेपाल स्पोटर््स र नेपाल पुलिसले नकआउट चरणमा स्थान बनाएका हुन् । आईतवार भएको समूह ‘बी’ को खेलमा पुलिसले खिल्जी युवा क्लवमाथि ३–० को सोझो सेटमा जित निकाल्यो । पुलिसले खिल्जी युवालाई २५–२१, २५–१६ र २५–१६ ले हरायो । यस समूहमा पुलिस र खिल्जी युवासँगै ढोरपाटन क्लब छन् । पहिलो खेलमा ढोरपाटनलाई ३–१ को सेटमा हराएको थियो । लगातार दोस्रो जित निकाल्दै पुलिस समूह विजेताका रूपमा क्वार्टरफाइनलमा पुगेको हो । 

२२. चितवन क्रिकेट क्लबलाई इन्डो÷नेपाल टी ट्वान्टीको उपाधि

चितवन क्रिकेट क्लबले घरेलु मैदानमा भएको इन्डो÷नेपाल टी ट्वान्टी च्याम्पियनसिपको उपाधि उचालको छ । चितवनको गौतम बुद्ध रंगलशालामा आईतवार सम्पन्न फाइनलमा चितवनले विभागीय टोली एपिएफमाथि एक विकेटको रोमाञ्चक जित निकाल्दै उपाधि उचालेको हो । विजेता चितवनले च्याम्पियन ट्रफीसँगै चार लाख रुपैयाँ प्राप्त ग¥यो । एपिएफले भने दुई लाख रुपैयाँमा चित्त बुझायो । एपिएफले एक सय ४४ रनको लक्ष्य दिएको थियो । तर, त्यो लक्ष्य पछ्याएको घरेलु टोली चितवन क्रिकेट क्लबले १९.५ ओभरमा ९ विकेटको क्षतिमा पूरा ग¥यो । चितवनको शुभ कंसाकारले ६७ रनको अर्धशतकीय इनिङ खेले । दीपक डुम्रेले ३२ बलमा ३७ रन जोडे । एपिएफको बलिङमा इर्साद अहमदले पाँच विकेट लिए पनि चितवनको जित रोक्न सकेनन् ।  –न्युज एजेन्सी नेपाल