२०८२ आश्विन २७ गते सोमवार
२०८२ आश्विन २७ गते सोमवार
काठमाडौं । अन्तरिम प्रधानमन्त्री सुशीला कार्कीले संविधान दिवस केबल उत्सव मात्र नभएर संघीय लोकतान्त्रिक गणतन्त्रको मूल्यांकन गर्ने दिन पनि भएको बतएकी छन् ।
टुँडिखेलमा आयोजित संविधान दिवसको विशेष समारोहलाई सम्बोधन गर्दै कार्कीले आन्दोलनको मर्मलाई आत्मसाथ गर्दै वर्तमान सरकारले जनआकांक्षा अनुसार दृढ संकल्पका साथ काम गर्ने बाचा गरेकी छन् ।
संविधान निर्माण पछिका एक दशकमा हासिल उपलब्धि र भएका कमजोरी समीक्षा गरी अबको कार्यदिशा तय गर्नुपर्ने कार्कीको भनाइ थियो ।
उनले भनिन्, ‘संविधान दिवस केबल उत्सव मात्र हैन संघीय लोकतान्त्रिक गणतन्त्रको मूल्यांकन गर्ने दिन पनि हो । यो संविधान कार्यान्वयनमा आएको विगत एक दशकमा संविधानले मार्गदर्शन गरेको यात्रामा के हासिल गर्यौं के गर्न सकेनौं । यो बीचमा के कस्ता कमीकमजोरी रहे र आगामी दिनमा के कस्ता कार्यदिशा आवश्यक छ भन्ने सवालहरूको गम्भिरतापूर्वक समीक्षा गर्नुपर्ने स्थिति छ ।’
लोकतन्त्र जनताको आवाज सुन्ने संवाद गर्ने र समाधान खोज्ने प्रणाली भएको भन्दै जेनजीको आन्दोलन हामीले प्रतिवद्धता गरेको संघीय गणतन्त्रक शासन प्रणाली, नागरिक स्वतन्त्रता, मौलिक अधिकार, मानव अधिकार, सुशासन कानूनी राज्य स्वतन्त्र र सक्षम न्यायपालिकालगायतका मूल्य मान्यतामा खरो उत्रिन नसक्नुको परिणाम भएको प्रधानमन्त्रीको बुझाइ छ ।
सरकारका काम कारबाही पारदर्शीता, कानूनी समानता, भ्रष्टाचारको अन्त्य, सुशासन र विकास जस्ता प्रश्नहरु सबै पुस्ताका साझा अपेक्षा र राष्ट्रिय एजेण्डा भएको कार्कीले बताइन् ।
आफू पदको लोभ लिएर प्रधानमन्त्री भएको नभइ देश संकटमा रहेको बेला युवा पुस्ताको अनुरोधको आधारमा संक्रमणको व्यवस्थापन गर्न नेतृत्व लिएको उनको प्रष्टोक्ति थियो ।
नेपालको संविधान अनुसार ६ महिनाभित्र प्रतिनिधिसभाको निर्वाचनमार्फत जनप्रतिनिधि सरकारलाई जिम्मेवारी हस्तान्तरण गरिने उनले कार्कीले दोहोर्याइन् ।
जेनजी आन्दोलनका क्रममा क्षतिग्रस्त भएका संरचनाको पुननिर्माणका साथै व्यवसायिक प्रतिष्ठानमा भएको क्षतिबाट पनि माथि उठाउनुपर्ने चुनौति रहेको उल्लेख गर्दै यसमा सहयोग गर्न प्रधानमन्त्रीले आव्हान गरिन् ।
© 2025 All right reserved to khabarcnter.com | Site By : Sobij
