२०८२ कार्तिक ७ गते शुक्रवार
२०८२ कार्तिक ७ गते शुक्रवार
काठमाडौं । ‘भिजिट भिसा’ प्रकरणमा पार्टीको छानबिन समितिकी संयोजक डा. चन्दा कार्कीले प्रतिवेदन बुझाएकी छिन् । बुधबार केन्द्रीय कार्यालय वनस्थलीमा कार्यवाहक सभापति डोलप्रसाद अर्याललाई कार्कीले प्रतिवेदन बुझाएकी हुन् ।
भिजिट भिसा मार्फत मानव तस्करी गर्ने काममा सरकारका गृहमन्त्री रमेश लेखक समेत मुछिएको आरोप लगाउँदै रास्वपाले राजीनामा माग राखी संसद् अवरोध जारी राखेको छ ।
तर कांग्रेसका सांसद रामहरि खतिवडाले रास्वपाका कार्यवाहक सभापति डोलप्रसाद अर्याल नै भिजिट भिसा मार्फत मानव तस्करीमा संलग्न रहेको आरोप लगाएपछि कार्कीको नेतृत्वमा छानबिन समिति गठन गरेको थियो । प्रतिवेदनमा आफ्नो मन्तव्य राख्दै छानबिन समितिको संयोजकको जिम्मेवारी गम्भीर उत्तरदायित्वका साथ निर्वाह गरेको जिकिर गरेकी छिन् ।
कार्कीले भिजिट भिसाको आवरणमा देशमा भइरहेको मानव तत्करी विरुद्ध रास्वपाले सशक्त रूपमा लड्दा लड्दैको अवस्थामा उल्टै रास्वपाको छवि, संस्थागत विश्वसनीयता र उत्तरदायित्वलाई नै प्रत्यक्ष रूपमा प्रभावित गर्ने अवस्था सिर्जना भएको उनको भनाइ छ ।
‘यही पृष्ठभूमिमा, रास्वपाको पार्टी सचिवालयले सत्य तथ्य उजागर गर्दै आवश्यक मार्ग निर्देशनका लागि यस छानबिन समिति गठन गरेको हो । समितिले आफ्नो कार्यादेश अनुसार प्रारम्भिक बैठक २०८२ असार ३ गते बसी कार्यविधि निर्माण, कार्यसम्पादनको ढाँचा र आवश्यक सहयोगी संरचना निर्धारण गरेको थियो’, मन्तव्यमा उनले भनेकी छिन् ।
कार्यवाहक सभापति अर्याल, महामन्त्री तथा समितिका सदस्यहरूको उपस्थितिमा दोस्रो बैठक बसेर आवश्यक परामर्श प्राप्त गरिएको बताएकी छिन् । समितिले सात औपचारिक तथा आठ अनौपचारिक गरी १५ वटा बैठकहरू मार्फत यस प्रतिवेदनलाई सर्वसम्मत रूपमा निष्कर्ष सम्म पुऱ्याएको स्पष्ट पारेकी छिन् ।
© 2025 All right reserved to khabarcnter.com | Site By : Sobij
