२०८२ भाद्र १२ गते बिहिवार
२०८२ भाद्र १२ गते बिहिवार
काठमाडौं । सभामुख देवराज घिमिरेले भिजिट भिसा प्रकरणमा संसद्मा निरन्तर विरोधमा उत्रेका रास्वपा र राप्रपाका नेताहरूसँग छलफल गरेका छन् ।
मंगलबार दिउँसो सभामुखले कानुन, न्याय तथा संसदीय मामिला मन्त्री अजयकुमार चौरसियासहित रास्वपा कार्यवाहक सभापति डीपी अर्याल र राप्रपा उपाध्यक्ष बुद्धिमान तामाङसँग छलफल गरेका हुन् ।
त्यस क्रममा सभामुख घिमिरेले भिसा प्रकरणलाई लिएर दुवै दल निरन्तर संसदीय कारबाहीमा सहभागी नभएको भन्दै सरकार र दलहरूबिच संवाद हुन नसक्दा त्यसको असर संसद्मा परेको बताए ।
‘यो कुरा सभामुखका रूपमा मैले अप्ठ्यारो महसुस गरिरहेको छु । मेरो ठाउँमा अरू कोही सभामुख भए पनि संसद् चलाउनुपर्ने बाध्यात्मक स्थिति छ’, सभामुख घिमिरेले भने, ‘सरकारले आगामी आर्थिक वर्षमा १२१ वटा विधेयक दिने भनेको छ । तर हाउस निरन्तर अवरोध हुँदा ती विधेयकको अवस्था के हुन्छन्, यसतर्फ सबैले सोच्न जरुरी छ । संसद् चलाउने वातावरण बनाउन म सरकार र विपक्षी दलहरूलाई आग्रह गर्दछु ।’
उनले दलहरुको सैद्धान्तिक, राजनीतिक मुद्दाहरूप्रति आफ्नो केही भन्नु नरहेको भन्दै संसदीय गतिविधि प्रभावित नपार्न आग्रह गरे । छलफलमा कानुन, न्याय तथा संसदीय मामिला मन्त्री चौरसियाले सरकारले छानबिन समिति बनाएर काम सुरु गरेको भन्दै विपक्षीलाई नजरअन्दाज गरेर सरकार अघि बढ्न नचाहेको बताए ।
‘रास्वपा र राप्रपासँग पनि सरकारले छलफल गरिनै रहेको छ । एउटा सहमतिको बिन्दुमा पुग्न तपाईँहरू पनि लचिलो हुनुहोस्, सरकारले आवश्यक गृहकार्य गर्छ’, मन्त्री चौरसियाको भनाइ छ ।
रास्वपा कार्यवाहक सभापति अर्यालले आफूहरूले उठाएका मुद्दा धेरै गम्भीर भएपनि सम्बोधन गर्न छाडेर सरकारले उल्टै गैरजिम्मेवारी देखाएको बताए । राप्रपा उपाध्यक्ष तामाङले वैरागी छानबिन समितिले के काम गरेको छ भनेर समेत संसद्लाई जानकारी नदिएको बताए ।
© 2025 All right reserved to khabarcnter.com | Site By : Sobij
