२०८३ कार्तिक २९ गते आइतवार
२०८३ कार्तिक २९ गते आइतवार
काठमाडौं । त्रिभुवन अन्तर्राष्ट्रिय विमानस्थलबाट प्रहरीले करिब २२ करोड रुपैयाँ मूल्य बराबरको साढे ५ किलो सेतो हेरोइन बरामद गरेको छ ।
लागुऔषध नियन्त्रण ब्युरोका अनुसार थाइल्यान्डबाट काठमाडौं आएका एक भारतीय नागरिकको लगेजबाट उक्त हेरोइन बरामद गरिएको हो । पक्राउ पर्नेमा महाराष्ट्रका ५२ वर्षीय रेवराज टिघारे रहेका छन् ।
शनिबार बिहान शङ्कास्पद लागेर प्रहरीले चेकजाँच गर्दा उनको लगेजमा रहेको खरायो र बिरालोको खानाको प्याकेटभित्र लुकाइएको अवस्थामा हेरोइन फेला परेको थियो । बरामद हेरोइनको अवैध बजार मूल्य करिब २२ करोड रुपैयाँ रहेको अनुमान गरिएको छ ।
अनुसन्धानका क्रममा पक्राउ परेका टिघारे यसअघि पनि दुई पटक लाओस हुँदै काठमाडौं आएर भारत गएको खुलेको छ । उनले जिम्बाब्वे, सुडान, बङ्गलादेश र कम्बोडियासमेत भ्रमण गरेको यात्रा विवरणबाट देखिएको प्रहरीले जनाएको छ ।
लागुऔषध कारोबारको अन्तर्राष्ट्रिय सञ्जालका मुख्य व्यक्तिमध्ये उनी एक रहेको प्रारम्भिक अनुसन्धानबाट खुलेको ब्युरोका एसएसपी सुवास बोहराले बताएका छन् । उनको साथबाट मेकानिकल इन्जिनियरको प्रमाणपत्रसमेत बरामद भएको छ ।
आरोपीमाथि लागुऔषध नियन्त्रण ऐन, २०३३ अनुसार अनुसन्धान भइरहेको प्रहरीले जनाएको छ । कानुनी व्यवस्थाअनुसार सेतो हेरोइन कारोबारमा संलग्नलाई १५ वर्षदेखि जन्मकैदसम्मको सजाय र ५ लाखदेखि २५ लाख रुपैयाँसम्म जरिवाना हुन सक्नेछ ।
© 2026 All right reserved to khabarcnter.com | Site By : Sobij
