२०८३ कार्तिक २६ गते बिहिवार
२०८३ कार्तिक २६ गते बिहिवार
.gif)
काठमाडौं । इन्डोनेसियाका उपराष्ट्रपति गिब्रान राकाबुमिङ राकाले शैक्षिक प्रमाणपत्र विवाद चर्किएपछि राजीनामा दिएका छन् । उनका सहयोगी बुदी एरीका अनुसार गिब्रानले बुधबार राष्ट्रपति प्रबोवो सुबियान्तोलाई राजीनामा पत्र बुझाएका हुन् ।
इन्डोनेसियाको सर्वोच्च अदालतले सन् २०२४ को निर्वाचनमा गिब्रानले पेस गरेको माध्यमिक तहको शैक्षिक प्रमाणपत्र अमान्य ठहर गरेको थियो । अदालतले उनले माध्यमिक शिक्षा पूरा गरेको वा सोसरहको योग्यता हासिल गरेको प्रमाण नभेटिएको जनाएको थियो ।
फैसलापछि १०० भन्दा बढी सांसदले गिब्रानमाथि महाभियोग प्रक्रिया अघि बढाउन सक्ने संसदीय पहललाई समर्थन गरेका थिए । गिब्रानले भने अदालतको फैसलालाई चुनौती दिने र आफ्नो शैक्षिक योग्यताको वैधता प्रमाणित गर्ने अवसर मागेका थिए ।
गिब्रान सन् २०२४ को निर्वाचनमा राष्ट्रपति प्रबोवोका उम्मेदवार थिए । उनका पिता तथा तत्कालीन राष्ट्रपति जोको विडोडो (जोकोवी) र प्रबोवोबीच बनेको गठबन्धनका कारण उनी उपराष्ट्रपतिको उम्मेदवार बनेका थिए ।
पछिल्लो समय जोकोवी र प्रबोवोबीचको सम्बन्धमा तनाव बढ्दै गएको छ । प्रबोवोले जोकोवीका प्रमुख योजनालाई प्राथमिकता नदिएको र उनका निकट व्यक्तिहरूलाई सरकारी जिम्मेवारीबाट हटाउँदै लगेको बताइएको छ ।
गत साता राष्ट्रपति कार्यालयका प्रमुख लिस्तियो सिगित प्रबोवोलाई राष्ट्रपतिको फोन ट्यापिङ गरेको आशंकामा पक्राउ गरिएको थियो । उनी जोकोवीका निकट सहयोगी मानिन्छन् । पक्राउ परेको भोलिपल्ट प्रबोवोले उनलाई पदबाट बर्खास्त गरेका थिए ।
© 2026 All right reserved to khabarcnter.com | Site By : Sobij
