२०८३ आश्विन १५ गते बिहिवार
२०८३ आश्विन १५ गते बिहिवार
.gif)
काठमाडौं । जिम्बाब्वेको मरोन्डेरा क्षेत्रमा बुधबार हेलिकोप्टर दुर्घटना हुँदा चर्चित व्यवसायी विकनेल चिवायो र उनकी पत्नी लुसी मुतेकेसहित ६ जनाको मृत्यु भएको छ ।
दुर्घटनालगत्तै हेलिकोप्टरमा आगो लागेको थियो । हेलिकोप्टरमा चार यात्रु र दुई क्रु सदस्य सवार थिए । दुर्घटनामा सबै ६ जनाको मृत्यु भएको प्रहरीले जनाएको छ ।
मृतकमध्ये ४३ वर्षीय चिवायो राष्ट्रपति इमर्सन मनांगाग्वाका निकट मानिन्थे । प्रहरी र उद्धार टोली घटनास्थलमा पुगेर शवको पहिचान तथा उद्धार कार्यमा जुटेका छन् ।
राजधानी हरारेबाट करिब ७० किलोमिटर पूर्वमा रहेको मरोन्डेरामा हेलिकोप्टर दुर्घटनाग्रस्त भएको हो । प्रहरीले बुधबार साँझ करिब ५ बजे दुर्घटनाबारे जानकारी प्राप्त गरेको जनाएको छ । दुर्घटनाको कारण भने तत्काल खुल्न सकेको छैन । प्रहरीले घटनाबारे अनुसन्धान अघि बढाएको छ ।
चिवायो ऊर्जा तथा पूर्वाधारसम्बन्धी आयोजनामा काम गर्ने ‘इन्त्रात्रेक जिम्बाब्वे’का संस्थापक थिए । उनी ‘ग्वाण्डा सोलार प्रोजेक्ट’लगायत सरकारी ठेक्काका कारण पनि चर्चामा आएका थिए ।
उनी भड्किलो जीवनशैली र सामाजिक सञ्जालमा गर्ने पोस्टका लागि समेत परिचित थिए । उनले महँगा गाडी र विलासी हेलिकोप्टरसँगका तस्बिर सामाजिक सञ्जालमा सार्वजनिक गर्ने गरेका थिए ।
चिवायो राष्ट्रपति मनांगाग्वासहित जिम्बाब्वेका विभिन्न प्रभावशाली राजनीतिक नेतासँगको निकटताका कारण पनि चर्चामा रहने गरेका थिए ।
© 2026 All right reserved to khabarcnter.com | Site By : Sobij
