२०८२ भाद्र ९ गते सोमवार
२०८२ भाद्र ९ गते सोमवार
काठमाडौं । रोजगारीका सिलसिलामा भारत पुगेका बाजुराका एक दम्पती बाढीपहिरोमा परी ज्यान गुमाएका छन् । भारतको उत्तराखण्डमा साउन २० गते आएको विनाशकारी बाढीपहिरोले बाजुराको स्वामीकार्तिक खापर गाउँपालिका–२ का २३ वर्षीय रमेश बुढा र उनकी २१ वर्षीया पत्नी प्रिया बुढाको ज्यान लिएको हो ।
उत्तराखण्डको उत्तरकाशी जिल्लाको धराली गाउँमा आएको आकस्मिक बाढीपहिरोले उनीहरूको जीवन अकालमा अन्त्य गरिदिएको हो । रोजगारीका लागि छिमेकी मुलुक पुगेका रमेश र प्रिया दुबै जना प्राकृतिक प्रकोपको चपेटामा परेर सदाका लागि संसारबाट बिदा भए ।
उक्त घटनामा सोही गाउँपालिकाका २४ जना घाइते भएका छन् । घाइते हुनेमा स्वामीकार्तिक खापर–१ का प्रकाश बुढा (३६), पछना बुढा (२४), धन बुढा (२७), महेन्द्र महतारा (२८), जयन्द्र बुढा, वडा नम्बर २ का पसे बुढा (४९), दिनेश बुढा (२९), मानबहादुर बुढा (४२), रजबहादुर महतारा (३२), जनेश बुढा, पछी महतारा, बिर बुढा, वर्षनी बुढा रहेका छन् ।
यस्तै ७ महिनाकी बालिका अपसरा बुढा, बादल बुढा (३), मादप महतारा (२९), विपना बुढा, दिपेन्द्र महतारा (३४), मानबहादुर बुढा (३०), विष्णा बुढा, पल्लव महतारा, रुप्सा बुढा, पुष्पराज बुढा र रुप्स बुढा रहेका छन् । गाउँपालिकाले घटनाप्रति गहिरो दुःख व्यक्त गर्दै मृतकका परिवारजनप्रति समवेदना प्रकट गरेको छ ।
सुदूरपश्चिमका नागरिकहरू छोराछोरीको पालनपोषण र घरखर्चका लागि रोजगारीका सिलसिलामा भारतसहित अन्य मुलुक पुग्ने गरेका छन् । तर, वर्षेनी यस्ता दुर्घटनामा परी कैयौँ नेपाली घाइते हुने वा ज्यान गुमाउने घटनाहरू दोहोरिँदै आएका छन् ।
© 2025 All right reserved to khabarcnter.com | Site By : Sobij
