२०८३ कार्तिक २० गते शुक्रवार
२०८३ कार्तिक २० गते शुक्रवार
.gif)
काठमाडौं । यू–१९ एसिया कप क्रिकेटमा भारतविरुद्ध नेपालले निराशाजनक ब्याटिङ गरेको छ । ओमानको अल अमेरातमा शुक्रबार भएको समूह ‘ए’ को खेलमा नेपाल ४२.३ ओभरमा १२८ रनमै अलआउट भयो ।
भारतले जितका लागि १२९ रनको सामान्य लक्ष्य पाएको छ । नेपालको इनिङ्समा दर्श सोनारले सर्वाधिक ४३ रन बनाए । उनले ९३ बलको सामना गर्दै एक चौका प्रहार गरेका छन् । आशिष लुहारले ४५ बलमा २९ रन जोडे । उनीहरूबाहेक अन्य ब्याटरले उल्लेख्य योगदान दिन सकेनन् ।
नेपालको सुरुवात नै खराब भएको थियो । टोलीले ८.३ ओभरमा २७ रन बनाउँदा तीन विकेट गुमाइसकेको थियो । प्रारम्भिक ब्याटरहरू सस्तैमा आउट भएपछि नेपाल दबाबमा पर्यो ।
दर्श सोनार र आशिष लुहारले केही समय इनिङ्स सम्हाल्ने प्रयास गरेका थिए । तर उनीहरूको प्रयासले नेपालको स्कोरलाई प्रतिस्पर्धात्मक अवस्थामा पुर्याउन सकेन ।
भारतका अर्जुन राजपुतले उत्कृष्ट बलिङ गर्दै ५.३ ओभरमा ८ रन खर्चेर ३ विकेट लिए । भारतीय बलरहरूले नेपालको ब्याटिङलाई निरन्तर दबाबमा राखेका थिए ।
नेपालका लागि यो प्रतियोगिताको पहिलो खेल हो । समूह ‘ए’ मा नेपालसँगै भारत, पाकिस्तान र संयुक्त अरब इमिरेट्स (यूएई) छन् । समूहका शीर्ष दुई टोली सेमिफाइनलमा पुग्नेछन् ।
भारतविरुद्धको खेलमा कमजोर ब्याटिङ गरेको नेपालले अब बलिङमा उत्कृष्ट प्रदर्शन गर्नुपर्नेछ । १२९ रनको लक्ष्य सानो भए पनि भारतीय ब्याटरलाई सुरुमै दबाबमा राख्न सके नेपालले खेलमा फर्कने अवसर पाउनेछ ।
© 2026 All right reserved to khabarcnter.com | Site By : Sobij
