२०८३ आश्विन २४ गते शनिवार
२०८३ आश्विन २४ गते शनिवार
.gif)
काठमाडौं । नेपाली कम्युनिस्ट पार्टी (नेकपा) बागमती प्रदेशका असन्तुष्ट सांसदहरूले मुख्यमन्त्री किरण थापा मगरलाई विश्वासको मत दिने भएका छन् ।
मंगलबार दिउँसो पार्टी संयोजक पुष्पकमल दाहाल ‘प्रचण्ड’सँग छलफल गरेपछि असन्तुष्ट सांसदहरू मुख्यमन्त्री थापाको पक्षमा मतदान गर्न तयार भएका हुन् ।
नेकपा सांसद गंगानारायण श्रेष्ठका अनुसार राप्रपासँग सत्ता सहकार्य र नेकपा–एमालेबीच भएको पाँचबुँदे सहमतिअनुसार मन्त्रालय भागबन्डा नभएको विषयमा असन्तुष्टि रहे पनि अहिले विश्वासको मत दिने निर्णय भएको हो ।
श्रेष्ठले केन्द्रीय संयोजन समितिको बैठकले सत्ता सहकार्यका विषयमा अन्तिम निर्णय गर्ने सहमतिअनुसार मुख्यमन्त्रीलाई विश्वासको मत दिन लागिएको बताए ।
उनका अनुसार राप्रपासँग सत्ता सहकार्य उपयुक्त थियो वा थिएन भन्ने विषयमा प्रचण्डसँग राजनीतिक तथा वैचारिक छलफल भएको छ । केन्द्रीय संयोजन समितिको बैठकले निर्णय गरेपछि आवश्यक कदम चालिने उनले बताए ।
यसअघि नेकपाका सांसदहरू गंगानारायण श्रेष्ठ, कृष्णप्रसाद खनाल, राजेन्द्रमान श्रेष्ठ, युवराज चौलागाईं, रुकु चौलागाईं, लक्ष्मण लम्साल, उर्मिला लामा र ओमकुमारी श्रेष्ठले सरकार गठन प्रक्रिया र मन्त्रालय बाँडफाँटप्रति असन्तुष्टि जनाएका थिए ।
असन्तुष्टमध्ये कृष्ण खनाल, राजेन्द्रमान श्रेष्ठ, लक्ष्मण लम्साल र ओमकुमारी श्रेष्ठ साबिक नेकपा (एकीकृत समाजवादी) तथा अन्य सांसद माओवादी केन्द्रतर्फका हुन् ।
यससँगै मुख्यमन्त्री थापाको विश्वासको मत लिने प्रयासलाई सहजता मिल्ने देखिएको छ ।
© 2026 All right reserved to khabarcnter.com | Site By : Sobij
