२०८३ श्रावण २९ गते शुक्रवार
२०८३ श्रावण २९ गते शुक्रवार
.gif)
काठमाडौं । नेपाल एसबीआई बैंक लिमिटेडले गत आर्थिक वर्ष २०८२/८३ मा २ अर्ब ४ करोड ४३ लाख रुपैयाँ खुद नाफा आर्जन गरेको छ ।
बैंकले सार्वजनिक गरेको आर्थिक वर्षको चौथो त्रैमाससम्मको अपरिष्कृत वित्तीय विवरणअनुसार बैंकको खुद नाफा अघिल्लो आर्थिक वर्षको तुलनामा १२.८९ प्रतिशतले वृद्धि भएको हो । अघिल्लो वर्ष बैंकले १ अर्ब ८१ करोड रुपैयाँ खुद नाफा कमाएको थियो ।
बैंकको वितरणयोग्य मुनाफा पनि ४.५४ प्रतिशतले बढेर १ अर्ब २५ करोड १६ लाख रुपैयाँ पुगेको छ । अघिल्लो वर्ष यस्तो मुनाफा १ अर्ब १९ करोड ७३ लाख रुपैयाँ रहेको थियो । वितरणयोग्य मुनाफाका आधारमा बैंकको लाभांश क्षमता ११.०४ प्रतिशत रहेको छ ।
समीक्षा अवधिमा बैंकको कुल सञ्चालन आम्दानी ५.३१ प्रतिशतले बढेर ७ अर्ब १६ करोड ३५ लाख रुपैयाँ पुगेको छ । अघिल्लो वर्ष यस्तो आम्दानी ६ अर्ब ८० करोड २२ लाख रुपैयाँ थियो । त्यस्तै, बैंकको सञ्चालन मुनाफा ६.२३ प्रतिशतले बढ्दै २ अर्ब ९१ करोड ६१ लाख रुपैयाँ पुगेको छ ।
बैंकको खुद ब्याज आम्दानी पनि सामान्य वृद्धि भएको छ । अघिल्लो वर्ष ५ अर्ब २६ करोड ६० लाख रुपैयाँ रहेको खुद ब्याज आम्दानी बढेर ५ अर्ब ३३ करोड ४३ लाख रुपैयाँ पुगेको छ । गैर–ब्याज आम्दानी भने १८.६९ प्रतिशतले बढेर २ अर्ब ६९ लाख रुपैयाँ पुगेको छ ।
नाफामा सुधार आएसँगै बैंकको प्रतिसेयर आम्दानी पनि बढेको छ । अघिल्लो वर्ष १५.९८ रुपैयाँ रहेको ईपीएस समीक्षा अवधिमा बढेर १८.०४ रुपैयाँ पुगेको छ ।
बैंकले खराब कर्जा (एनपीएल) अनुपात घटाउन पनि सफलता हासिल गरेको छ । अघिल्लो वर्ष ३.३५ प्रतिशत रहेको खराब कर्जा घटेर २.९२ प्रतिशतमा झरेको छ । त्यस्तै, बैंकको कोषको लागत (कस्ट अफ फण्ड) ५.१८ प्रतिशतबाट घटेर ४.०६ प्रतिशतमा आएको छ ।
बैंकको पूँजी पर्याप्तता अनुपात पनि सुधार हुँदै १३.७४ प्रतिशत पुगेको छ । अघिल्लो वर्ष यस्तो अनुपात १२.७५ प्रतिशत रहेको थियो ।
हाल नेपाल एसबीआई बैंकको चुक्ता पुँजी ११ अर्ब ३३ करोड ५१ लाख रुपैयाँ रहेको छ । बैंकले समीक्षा अवधिमा २ खर्ब १२ अर्ब ८२ करोड रुपैयाँ निक्षेप संकलन गरी १ खर्ब ५४ अर्ब ३९ करोड रुपैयाँ कर्जा लगानी गरेको छ ।
समग्रमा बैंकको वित्तीय विवरणले नाफा वृद्धि, खराब कर्जा नियन्त्रण र कोष व्यवस्थापनमा सुधार भएको देखाएको छ ।
© 2026 All right reserved to khabarcnter.com | Site By : Sobij
