२०८२ भाद्र २६ गते बिहिवार
२०८२ भाद्र २६ गते बिहिवार
काठमाडाैं । बंगलादेशमा शेख हसिनाको सरकार पतन भएपछि प्रदर्शनकारीहरूको तालिबानी शैलीमा कारबाही गरेकाे घटना सार्वजनिक भएको छ। प्रदर्शनकारीहरूले जेसाेरस्थित अवामी लीगका नेताहरू बसेकाे एक हाेटलमा आगाे लगाएका थिए । सञ्चार माध्यमले जनाएअनुसार आगलागी हुँदा कम्तीमा ८ जनाको मृत्यु भएको छ भने ८४ जना घाइते भएका छन् ।
होटलका मालिक जेसोर जिल्ला अवामी लिगका महासचिव शाहीन चक्लादार थिए। सञ्चारमाध्यमलाई उपायुक्त अबरारुल इस्लामले घटनाको पुष्टि गरेका छन् । मृत्यु हुनेमा २० वर्षीय छयन र १९ वर्षीय सेजन हुसेन रहेका छन् । अस्पतालका कर्मचारी हारुन रसिदले त्यहाँ कम्तीमा ८४ जनाको उपचार भइरहेको र अधिकांश विद्यार्थी रहेको बताए ।
आन्दाेलन आक्रामक बनेसँगै साेमबार हसिनाले देश छाडेर भागेकी थिइन् । उनले भागेसँगै देशभर आन्दाेलनकारीले उत्सव मनाएका थिए । साेही क्रममा आन्दाेलनकारीले हाेटलमा आगाे लगाएका हुन् । आन्दाेलनकारीले अवामी लिगको कार्यालय र नेताहरूकाे घरमा पनि आक्रमण गरेका थिए ।
बंगलादेशमा आगजनी र हिंसाका कारण अहिलेसम्म कम्तिमा ३०० जनाको ज्यान गएको छ । समाचार एजेन्सी एएफपीको सोमबारको रिपोर्टमा यस्तो दाबी गरिएको हो।
यद्यपी मृत्यु हुनेको संख्या ३ सय हो भन्नेबारे आधिकारिक बयान भने आएको छैन ।
सरकारी अधिकारीहरूले एक सय जनाको मृत्यु भएको पुष्टि गरेका छन् । आइतबार भएको झडपमा मात्रै १४ प्रहरीसहित १०० जनाको मृत्यु भएको थियो भने सयौं घाइते भएका थिए ।
© 2025 All right reserved to khabarcnter.com | Site By : Sobij
