२०८२ कार्तिक १३ गते बिहिवार
२०८२ कार्तिक १३ गते बिहिवार
अमेरिकी राष्ट्रपति जो बाइडेनले काबुल विमानस्थलमा फेरि आतंकवादी आक्रमण हुन सक्ने चेतावनी दिएका छन् । बाइडेनले एक वक्तव्य जारी गर्दै आफूलाई आफ्नो इन्टेलिजेन्सको तर्फबाट आइतबार यो आक्रमण हुन सक्ने जानकारी दिइएको बताएका छन् ।
समाचार एजेन्सी एपीका अनुसार बाइडेनले २४ देखि ३६ घण्टाभित्र अर्को आक्रमण हुन सक्ने सम्भावना निकै उच्च रहेको बताउँदै अमेरिकीहरुलाई विमानस्थलतिर नजान भनेका छन् ।
अमेरिकी विदेश मन्त्रालयले अमेरिकी नागरिकहरुलाई आक्रमणको बलियो र भरपर्दो सूचना आएकोले विमानस्थलको क्षेत्रबाट टाढा रहन आग्रह गरेको छ । अमेरिकाले अहिले पनि अफगानिस्तानबाट मानिसहरुलाई बाहिर निकाल्ने काम गरिरहेको छ । बेलायतले भने आफ्ना सैनिक, कूटनीतिज्ञ र अधिकारीहरुलाई निकालिसकेको छ ।
बिहीबार काबुल विमानस्थल नजिकै आत्मघाती आक्रमण भएको थियो । यो आक्रमणमा कम्तीमा १७० जनाको मृत्यु भएको छ । यो आक्रमणको जिम्मेवारी इस्लामिक स्टेटको स्थानीय शाखा इस्लामिक स्टेट खुरासानले लिएको छ । काबुल विमानस्थलमा भएको आक्रमणको जवाफमा अमेरिकाले पश्चिमी अफगानिस्तानमा ड्रोन आक्रमण गरेर इस्लामिक स्टेट खुरासानका २ सदस्य मारिएको बताएको छ । यी २ जना काबुल आक्रमणका योजनाकार रहेको बताइएको छ ।
बाइडेनले वक्तव्यमा भनेका छन् ‘यो अन्तिम जवाफी कारवाही थिएन । जसले पनि काबुल विमानस्थलमा आक्रमण गरेका थिए उनीहरुलाई छोडिने छैन । उनीहरुले यसको मूल्य चुकाउनुपर्नेछ ।’ आइएस–के अफगानिस्तानको सबैभन्दा हिंसक चरमपन्थी समूह मानिन्छ जसको तालिबानसँग खुला मतभेद छ । अहिले अफगानिस्तानको सत्ता तालिबानकै हातमा छ । तालिबानले अमेरिकाको एयरस्ट्राइकको निन्दा गरेको छ ।
अर्कोतर्फ अमेरिकी सैनिकले काबुल विमानस्थल छाड्न सुरु गरेका छन् । अहिले काबुल विमानस्थलमा ४ हजारभन्दा कम जवान छन् । अघिल्लो हप्ता ५ हजार ८ सय जवान थिए । ह्वाइट हाउसका अधिकारीले पनि आउँदा केही दिन निकै खतरनाक हुन लागेको बताएका छन् । तालिबानले विमानस्थलको चारैतिर चेकप्वाइन्ट बनाएको छ ताकि अफगानी नागरिकलाई विमानस्थल जानबाट रोक्न सकियोस् ।
© 2025 All right reserved to khabarcnter.com | Site By : Sobij
