२०८३ कार्तिक २६ गते बिहिवार
२०८३ कार्तिक २६ गते बिहिवार
.gif)
काठमाडौं । छठ पर्व मनाउन काठमाडौंबाट सर्लाहीस्थित घर फर्किंदै गरेका यात्रु सवार माइक्रोबस मकवानपुरको भीमफेदीमा दुर्घटनाग्रस्त भएको छ । दुर्घटनामा १० जनाको मृत्यु भएको छ भने पाँच जना घाइते भएका छन् ।
सर्लाहीको चन्द्रघट्टा गाउँपालिका–४ का मुकेश यादव पनि उक्त माइक्रोबसमा सवार थिए । उनी बुधबार राति करिब २ बजे छठ पर्व मनाउन घर फर्किने क्रममा हाइस चढेका थिए । उनीसँगै एउटै गाउँका छिमेकी र आफन्तहरू पनि यात्रामा थिए ।
बिहीबार बिहान करिब ५:४५ बजे मधेस प्रदेश ०३–००१ ज ०८८० नम्बरको माइक्रोबस भीमफेदी गाउँपालिका–६ चिसापानी गढीस्थित सडकबाट करिब पाँच सय मिटर तल खसेर दुर्घटना भएको थियो । दुर्घटनाका बेला अधिकांश यात्रु निदाइरहेका थिए ।
मुकेश पनि निद्रामै थिए । गाडी कसरी सडकबाट तल खस्यो भन्नेबारे उनलाई कुनै जानकारी भएन । गाडी भिरमा खसेर पल्टिएपछि मात्रै उनी ब्युँझिएका थिए ।
हेटौँडा अस्पतालमा उपचाररत मुकेशले दुर्घटनाको क्षण सम्झँदै भने, ‘हामी सबै जना सुतेका थियौँ । तल खसेपछि मात्रै गाडी दुर्घटना भएको थाहा भयो । गाडीसँगै तल पुगेका थियौँ ।’
मुकेशका अनुसार छठ पर्वका लागि घर फर्किने योजना बनाएर एउटै गाउँका छिमेकी र आफन्तहरूले फोनमार्फत गाडीको सिट रिजर्भ गरेका थिए । उनले आफूले चिनेका दुई परिवारका सदस्यसहित अन्य यात्रु पनि गाडीमा रहेको बताए ।
उनी यसअघि पनि सोही गाडीमा यात्रा गरिसकेका थिए । चालकलाई समेत पहिलेदेखि चिन्ने भएकाले यसपटक पनि त्यही गाडी रोजेका थिए । तर, यसपटकको यात्रा भने कहिल्यै नबिर्सिने दुर्घटनामा परिणत भयो ।
चालक निदाएका थिए वा अन्य कुनै कारणले दुर्घटना भयो भन्नेबारे मुकेशलाई जानकारी छैन । आफू निदाइरहेकाले दुर्घटनाको कारण थाहा नपाएको उनले बताएका छन् ।
दुर्घटनामा १० जनाको मृत्यु भएको छ भने पाँच जना घाइते भएका छन् । घाइतेहरूको हेटौँडा अस्पतालमा उपचार भइरहेको छ ।
© 2026 All right reserved to khabarcnter.com | Site By : Sobij
