नेपाल संवत् ११४७को शुभकामना दिँदै प्रधानमन्त्री शाहले भने– ‘म्ह पूजा’ले आत्मशुद्धि र चेतनाको बोध गराउँछ

कार्तिक २४, २०८३ मंगलवार

169

नेपाल संवत् ११४७को शुभकामना दिँदै प्रधानमन्त्री शाहले भने– ‘म्ह पूजा’ले आत्मशुद्धि र चेतनाको बोध गराउँछ

काठमाडौं । प्रधानमन्त्री वालेन्द्र शाहले नेपाल संवत् ११४७ (न्हूदँया भिन्तुना) तथा म्ह पूजाको शुभकामना दिएका छन् ।

राष्ट्रिय विभूति शंखधर साख्वाःले देशभरका जनतालाई ऋणमुक्त पारेर सुरु गरेको नेपाल संवत् चन्द्रमामा आधारित नेपालीको मौलिक समयचक्र र पहिचान भएको उनले बताएका छन् ।

“आजैका दिन नेवार समुदायमा हर्षोल्लासपूर्वक मनाइने ‘म्ह पूजा’ को मर्म अति गहिरो छ; ‘म्ह’ अर्थात् आफ्नै देह र शरीरभित्रको चेतनालाई साक्षी राखेर, अष्टचिरञ्जीवीको प्रतीक मण्डपमा आफैँले आफैँलाई पूजा गर्ने यस परम्पराले आत्मशुद्धि र चेतनाको बोध गराउँछ,” उनले भनेका छन् ।

यो मौलिक परम्पराले नेवार समुदायभित्र आपसी सद्भाव, आत्मबल र पुख्र्यौली संस्कृतिको जगेर्ना गर्दै जातीय एकतालाई अझ प्रगाढ बनाउने गरेको उनले प्रस्ट पारेका छन् । यसलाई प्रधानमन्त्री बालेनले नेपाल र नेपालीको गौरव भनेका छन् ।

“आजैका दिन भगवान् श्रीकृष्णले गोवर्द्धन पर्वत उठाएर द्वारिकावासीलाई बचाउनुभएको पौराणिक मान्यतासँगै, कृषिकर्मका सहयात्री गोरुलाई पिठो, नुन र बावर खुवाइन्छ तथा हलो, फालीसहितका कृषि औजारहरूको पूजा गरी गोवर्धन पूजा तथा हली तिहार मनाइन्छ,” उनले भनेका छन् ।

भैलोका मीठा भाका र देउसेहरूको उल्लासमय आशीर्वादले छरछिमेकमा आपसी आत्मीयता र सद्भाव थप्ने उनको भनाइ छ । यी मौलिक चाडपर्वहरूले रिसराग सबै भुलेर सामाजिक एकता र सहिष्णुताको भावनालाई सधैँ बलियो बनाउन प्रेरित गर्ने उनको बुझाइ छ ।

प्रकाशित मिति :कार्तिक २४ २०८३ मंगलवार - ०८:०४:१० बजे

प्रतिक्रिया