२०८३ आश्विन २६ गते सोमवार
२०८३ आश्विन २६ गते सोमवार
.gif)
काठमाडौं । जबरजस्ती करणी मुद्दामा १८ वर्ष कैद सजाय पाएका जेनजी आन्दोलनका क्रममा फरार भएका एक कैदीलाई प्रहरीले रुपन्देहीबाट पक्राउ गरेको छ । पक्राउ पर्नेमा कपिलवस्तुको वाणगंगा नगरपालिका–१०, भावपुरका २३ वर्षीय विष्णु चौधरी थारु रहेका छन् ।
जिल्ला प्रहरी कार्यालय कपिलवस्तुका सूचना अधिकारी प्रहरी नायब उपरीक्षक रिपेन्द्रकुमार सिंहका अनुसार चौधरी २०८२ भदौ २५ गते जेनजी आन्दोलनका क्रममा तौलिहवा कारागारबाट भागेर फरार भएका थिए ।
फरार कैदीको खोजतलास गर्ने क्रममा इलाका प्रहरी कार्यालय पिपराका प्रहरी निरीक्षक कालिका कार्कीको नेतृत्वमा खटिएको प्रहरी टोलीले उनलाई रुपन्देहीको मायादेवी गाउँपालिका–८ मा लुकिछिपी बसेको अवस्थामा पक्राउ गरेको हो । प्रहरीले पक्राउ परेका चौधरीलाई बाँकी कैद भुक्तानका लागि असोज २३ गते कारागार कार्यालय तौलिहवा पठाएको जनाएको छ ।
जिल्ला प्रहरी कार्यालय कपिलवस्तुका अनुसार चौधरीविरुद्धको जबरजस्ती करणी मुद्दामा अदालतले २०८० असोज ७ गतेको घटनासम्बन्धी कसुर ठहर गर्दै २०८० चैत २९ गते फैसला गरेको थियो । अदालतले उनलाई १८ वर्ष कैद सजाय तोकेको थियो ।
प्रहरीका अनुसार चौधरीले यसअघि दुई वर्ष तीन महिना १९ दिन कैद भुक्तान गरिसकेका छन् । अब उनले १५ वर्ष आठ महिना ११ दिन कैद भुक्तान गर्न बाँकी रहेको जिल्ला प्रहरी कार्यालय कपिलवस्तुले जनाएको छ ।
© 2026 All right reserved to khabarcnter.com | Site By : Sobij
