२०८३ आश्विन ७ गते बुधवार
२०८३ आश्विन ७ गते बुधवार
.gif)
काठमाडौं । त्रिभुवन अन्तर्राष्ट्रिय विमानस्थलबाट श्रम स्वीकृति नलिएका यात्रुलाई गैरकानुनी रूपमा वैदेशिक रोजगारीका लागि उडाएको घटनामा अध्यागमन अधिकृतमाथि छानबिन अघि बढाइएको छ ।
असोज ५ गते कुवेत जान लागेका एक यात्रुलाई आवश्यक श्रम स्वीकृति नहुँदा पनि प्रस्थान अनुमति दिएको पाइएपछि विमानस्थलस्थित अध्यागमन कार्यालयमा कार्यरत अधिकृत चेतबहादुर सेजुवाललाई विभागमा तानिएको हो ।
अध्यागमन विभागका अनुसार प्रारम्भिक अनुसन्धानका क्रममा यात्रु उडिसकेपछि मात्रै वैदेशिक रोजगार विभागको प्रणालीमा उनको श्रम स्वीकृतिको प्रक्रिया अघि बढाइएको देखिएको छ । नेपाली पोर्ट प्रणालीको विवरण तथा विमानस्थलको सीसीटीभी फुटेज अध्ययन गर्दा घटनाबारे थप तथ्य खुलेको विभागले जनाएको छ ।
ती यात्रु असोज ५ गते बिहान करिब ६ः३० बजे अध्यागमन क्षेत्रमा पुगेका थिए । श्रम स्वीकृति नभए पनि उनले अध्यागमन डेस्कमा करिब आधा घण्टा कुराकानी गरेको र सोही क्रममा तेस्रो व्यक्तिसँग समेत सम्पर्क भएको अनुसन्धानबाट खुलेको बताइएको छ । त्यसपछि बिहान करिब ७ः१० बजे उनलाई प्रस्थान अनुमति दिइएको थियो ।
घटनामा एक जना बिचौलियाको समेत भूमिका देखिएको विभागले जनाएको छ । अध्यागमन विभागका निर्देशक टीकाराम ढकालका अनुसार जापानमा रहेका एक व्यक्तिले क्यूआरमार्फत बिचौलियालाई २३ हजार रुपैयाँ पठाएको प्रारम्भिक अनुसन्धानमा खुलेको छ ।
रकम पठाएपछि बिचौलियामार्फत प्रक्रिया मिलाइएको र रकम आएको यकिन गरेर अध्यागमन अधिकृत सेजुवालले प्रस्थान अनुमति दिएको देखिएको विभागको भनाइ छ ।
प्रारम्भिक छानबिनले प्रस्थान अनुमति दिने अध्यागमन अधिकृतको प्रत्यक्ष संलग्नता देखिएको निष्कर्ष निकालेपछि घटनाबारे विस्तृत अनुसन्धानका लागि अख्तियार दुरुपयोग अनुसन्धान आयोगमा लेखेर पठाइएको निर्देशक ढकालले जानकारी दिए ।
© 2026 All right reserved to khabarcnter.com | Site By : Sobij
