२०८३ भाद्र ४ गते बिहिवार
२०८३ भाद्र ४ गते बिहिवार
.gif)
काठमाडौं । कुलमान घिसिङ नेतृत्वको उज्यालो नेपाल पार्टी समर्थित युवा सङ्गठन राष्ट्रिय उज्यालो युवा फ्रन्ट नेपालले सर्वसाधारण उपभोक्ताको विद्युत् महसुलमा मूल्य अभिवृद्धि कर (भ्याट) लगाउने सरकारको निर्णयविरुद्ध देशव्यापी हस्ताक्षर अभियान सुरु गरेको छ ।
नेपाल विद्युत् प्राधिकरणले उद्योगी तथा व्यवसायीबाट असुल गर्न बाँकी रहेको डेडिकेटेड तथा ट्रङ्क लाइनको बक्यौता रकम नउठाई सर्वसाधारण उपभोक्तामाथि थप भार पार्ने गरी भ्याट लगाइएको भन्दै सङ्गठनले अभियान थालेको जनाएको छ ।
सङ्गठनका केन्द्रीय अध्यक्ष राजकुमार मैनालीका अनुसार अभियानमा सहभागी हुन प्रदेश, जिल्ला र स्थानीय तहका कमिटीहरूलाई परिपत्र गरिएको छ । उनले भदौ १ गतेदेखि २५ गतेसम्म २५ दिने कार्यतालिका बनाएर अभियान सञ्चालन गरिएको जानकारी दिए ।
कार्यतालिका अनुसार भदौ १ गते काठमाडौंको माइतीघर मण्डलाबाट अभियानको औपचारिक सुरुवात गरिएको छ । भदौ २४ गतेसम्म माइतीघरमा निरन्तर हस्ताक्षर सङ्कलन गरिनेछ भने भदौ २ गतेदेखि देशभरका प्रदेश, जिल्ला र स्थानीय तहमा समेत समानान्तर रूपमा अभियान सञ्चालन गरिनेछ ।
अभियानअन्तर्गत भदौ २० गते स्थानीय तह कमिटीको नेतृत्वमा स्थानीय सरकारमार्फत नेपाल सरकारलाई ज्ञापनपत्र बुझाइनेछ । त्यस्तै भदौ २२ गते जिल्ला कमिटीमार्फत जिल्ला प्रशासन कार्यालय र भदौ २३ गते प्रदेश कमिटीमार्फत मुख्यमन्त्री कार्यालयमा ज्ञापनपत्र बुझाउने कार्यक्रम तय गरिएको छ ।
अभियानको अन्तिम दिन भदौ २५ गते सङ्कलित हस्ताक्षरसहित केन्द्रीय समितिको नेतृत्वमा ऊर्जा मन्त्रालयमार्फत नेपाल सरकारलाई ज्ञापनपत्र बुझाइने र २५ दिने अभियान सम्पन्न गरिने सङ्गठनले जनाएको छ ।
© 2026 All right reserved to khabarcnter.com | Site By : Sobij
