२०८३ भाद्र ४ गते बिहिवार
२०८३ भाद्र ४ गते बिहिवार
.gif)
काठमाडौं । लुम्बिनी प्रदेशका मुख्यमन्त्री चेतनारायण आचार्यले विश्वासको मत लिने तयारी गरिरहँदा सरकारलाई समर्थन गर्ने दलका सांसदहरू नेकपा एमालेको संसदीय कार्यालयमा भेला भएका छन् ।
एमालेसहित सरकारको पक्षमा रहेका नेपाली कम्युनिस्ट पार्टी र राष्ट्रिय जनमोर्चालगायत दलका प्रदेशसभा सदस्यहरू एमाले संसदीय कार्यालयमा जुटेका हुन् ।
सांसदहरू सामूहिक रूपमा प्रदेशसभा बैठकमा सहभागी हुने तयारीमा रहेका छन् । सांसदहरूको उपस्थितिसँगै मुख्यमन्त्री आचार्यको पक्षमा आवश्यक बहुमत पुग्ने दाबी गरिएको छ ।
नेपाली कांग्रेसले सरकारलाई दिएको समर्थन फिर्ता लिएपछि संवैधानिक व्यवस्थाअनुसार मुख्यमन्त्री आचार्यले प्रदेशसभाबाट विश्वासको मत लिन लागेका हुन् ।
विश्वासको मतका लागि एमालेसहित सरकारमा सहभागी दलहरूबीच यसअघि नै आवश्यक समन्वय भएको बताइएको छ । एमाले संसदीय कार्यालयमा भएको छलफलमा प्रदेशसभा बैठकमा सरकारको पक्षमा मतदान गर्ने विषयमा सहमति भएको जनाइएको छ ।
नेकपा केन्द्रका लुम्बिनी प्रदेश प्रमुख सचेतक इन्द्रजित थारुले पार्टीका सबै सांसदले मुख्यमन्त्री आचार्यलाई विश्वासको मत दिने निर्णय यसअघि नै गरिसकेको जानकारी दिए ।
उनले भने, “हाम्रो पार्टीका सबै सांसदले मुख्यमन्त्री चेतनारायण आचार्यलाई विश्वासको मत दिने निर्णय हिजो नै भएको हो । अहिले सत्ता समीकरणमा रहेका दलहरूबीच पनि आवश्यक समन्वय भएको छ ।”
मुख्यमन्त्री आचार्यले सोमबार बस्ने प्रदेशसभा बैठकमा विश्वासको मतसम्बन्धी प्रस्ताव पेस गर्ने कार्यसूची रहेको छ ।
© 2026 All right reserved to khabarcnter.com | Site By : Sobij
