२०८३ आश्विन १९ गते सोमवार
२०८३ आश्विन १९ गते सोमवार
.gif)
काठमाडौं । वैदेशिक रोजगार व्यवसायीले अघि सारेका विभिन्न माग सम्बोधन गर्न युवा तथा श्रम रोजगार मन्त्रालय सकारात्मक भएको छ । मन्त्रालय र व्यवसायीबीच भएको वार्तापछि व्यवसायीका मागहरू ४५ दिनभित्र सम्बोधन गर्ने सहमति भएको हो ।
नेपाल वैदेशिक रोजगार व्यवसायी संघका महासचिव हरि डाँगीका अनुसार वार्तामा सहमति जुटेसँगै व्यवसायीहरूले भोलिदेखि नियमित रूपमा कार्यालय सञ्चालन गर्ने भएका छन् ।
व्यवसायीहरूले सेवा शुल्क तोकिनुपर्ने, वैदेशिक रोजगार विभागले गरेको कारबाही फिर्ता लिनुपर्ने लगायतका १५ बुँदे माग राख्दै आन्दोलन गर्दै आएका थिए । माग सम्बोधन नभएको भन्दै उनीहरूले कार्यालय बन्द गर्ने र श्रमिक पठाउने काम रोक्ने घोषणा गरेका थिए ।
मन्त्रालयमा भएको छलफलपछि आन्दोलनका सम्पूर्ण कार्यक्रम फिर्ता लिइएको महासचिव डाँगीले जानकारी दिए ।
नेपाल वैदेशिक रोजगार व्यवसायी संघले साउन २२ गतेदेखि वैदेशिक रोजगार क्षेत्र सुधारका लागि विभिन्न १५ बुँदे माग राख्दै ध्यानाकर्षण तथा आन्दोलनका कार्यक्रम सञ्चालन गर्दै आएको थियो ।
वार्तामा श्रममन्त्री, मन्त्रालयका सचिव, संघका अध्यक्ष, सल्लाहकार तथा पदाधिकारीहरूको सहभागिता रहेको थियो । छलफलमा व्यवसायीले उठाएका १५ बुँदे मागबारे विस्तृत छलफल भएको मन्त्रालयले जनाएको छ ।
मन्त्रालयका अनुसार अधिकांश माग नीतिगत विषयसँग सम्बन्धित छन् । ती विषय वैदेशिक रोजगार ऐन तथा नियमावली संशोधन प्रक्रियामा समेत समेटिएका कारण संशोधनमार्फत सम्बोधन गर्न अधिकतम प्रयास गर्ने सहमति भएको हो ।
त्यस्तै, व्यवसायीका मागसँग सम्बन्धित आवश्यक प्रमाण तथा कागजात वैदेशिक रोजगार विभागमा पेश गर्न सकिने र विभागबाट आवश्यक प्रशासनिक सहजीकरण गर्ने सहमति पनि भएको मन्त्रालयले जनाएको छ ।
विभागबाट समाधान हुन नसकेका विषयमा मन्त्रालयमा पुनरावेदन गर्न सकिने कानुनी व्यवस्था अनुसार समस्या समाधान खोजिने बताइएको छ । मन्त्रालयले वैदेशिक रोजगारी क्षेत्रलाई थप पारदर्शी, सुरक्षित र मर्यादित बनाउन ऐन तथा नियमावली संशोधन प्रक्रिया अघि बढाइरहेको जनाएको छ ।
© 2026 All right reserved to khabarcnter.com | Site By : Sobij
