२०८३ श्रावण २८ गते बिहिवार
२०८३ श्रावण २८ गते बिहिवार
.gif)
काठमाडौं । अमेरिकाको युटा राज्यमा भीषण डढेलो नियन्त्रणका लागि परिचालन गरिएको अग्निनियन्त्रण हेलिकोप्टर दुर्घटना हुँदा पाइलट र चालक दलका एक सदस्यको मृत्यु भएको छ ।
दुर्घटना डढेलो नियन्त्रण अभियानका क्रममा भएको हो । सिकोस्र्की एस–६४ ‘स्काइक्रेन’ हेलिकोप्टर शुक्रबार स्थानीय समयअनुसार बिहान करिब १० बजे रिचफिल्डनजिकैको थ्री क्रिक्स रिजर्भोयर क्षेत्रमा दुर्घटनाग्रस्त भएको थियो । दुर्घटनास्थल वाइडमाउथ–२ डढेलोको दक्षिण–पूर्वी किनारनजिकै पर्छ ।
राष्ट्रिय अन्तरएजेन्सी अग्नि केन्द्र (एनआईएफसी) ले शनिबार दुर्घटनामा चालक दलका दुवै सदस्यको मृत्यु भएको पुष्टि गरेको हो । दुर्घटनाको २४ घण्टाभन्दा बढी समयपछि मात्रै उनीहरूको मृत्यु पुष्टि गरिएको थियो ।
एनआईएफसीका अनुसार अत्यधिक जोखिमपूर्ण आगलागीको अवस्था र भिरालो भू–भागका कारण उद्धार टोलीलाई दुर्घटनास्थलसम्म पुग्न कठिन भएको थियो । शनिबार शवहरू निकालिए पनि मृतकको नाम सार्वजनिक गरिएको छैन ।
डढेलोको जोखिमका कारण अधिकारीहरूले प्रभावित क्षेत्रका बासिन्दालाई सुरक्षित स्थानमा जान निर्देशन दिएका छन् भने केही सडकमा आवागमनसमेत बन्द गरिएको छ ।
वाइडमाउथ–२ डढेलो जुलाई २७ मा फिसलेक राष्ट्रिय वन क्षेत्रमा चट्याङका कारण सुरु भएको थियो । त्यसयता यसले १ लाख ११ हजार एकडभन्दा बढी अर्थात् करिब ४५ हजार हेक्टर क्षेत्र जलाइसकेको छ ।
© 2026 All right reserved to khabarcnter.com | Site By : Sobij
