२०८३ बैशाख ४ गते शुक्रवार
२०८३ बैशाख ४ गते शुक्रवार
काठमाडौं । बबई सिँचाइ आयोजनाले ठेक्का सम्झौता अनुसार काम पूरा नगर्ने एक निर्माण कम्पनीलाई ५ करोड ३३ लाख रुपैयाँ भन्दा बढी रकम सरकारी खातामा दाखिला गर्न ३५ दिने अल्टिमेटम दिएको छ ।
आयोजनाले वैशाख ४ गते एक सूचना जारी गर्दै गुलरिया, बर्दियाको अमन कन्स्ट्रक्सन कम्पनीलाई उक्त रकम बुझाउन निर्देशन दिएको हो ।
सूचना अनुसार कम्पनीले ५ करोड ३३ लाख ४२ हजार ९६.७ रुपैयाँ सरकारी बाँकी सरह बुझाउनुपर्ने छ । यसअघि आयोजनाले २०८२ साल चैत २ गते २१ दिनको समय दिएर पत्र काटे पनि कम्पनीले हालसम्म रकम दाखिला नगरेको आयोजनाले जनाएको छ ।
आयोजनाले दिएको ३५ दिनको समय सीमा भित्र तोकिएको बैंक खातामा रकम जम्मा गरी सक्कल भौचर पेस नगरेमा कडा कानुनी प्रक्रिया अपनाइने चेतावनी दिइएको छ ।
निर्धारित समयमा रकम नआएमा आर्थिक कार्यविधि तथा वित्तीय उत्तरदायित्व ऐन, २०७६ र नियमावली २०७७ बमोजिम कुमारी चोक तथा केन्द्रीय तहसिल कार्यालय मार्फत सरकारी बाँकी सरह असुल उपर गर्ने प्रक्रिया अगाडि बढाइने आयोजना जनाएको छ ।
आयोजना र अमन कन्स्ट्रक्सनबिच आर्थिक वर्ष २०७७\७८ मा विभिन्न चार वटा ठेक्का सम्झौता भएका थिए । तर, कम्पनीले सम्झौता अनुसार काम नगरेपछि सार्वजनिक खरिद ऐन, २०६३ को दफा ५९ बमोजिम ती सम्झौताहरू रद्द गरी कम्पनीलाई कालो सूचीमा राख्ने निर्णय भएको थियो ।
अदालतबाट रिट खारेज भएसँगै आयोजनालाई बाँकी काम अन्य प्रक्रियाबाट गराउँदा लाग्ने थप लागत रकम साबिकको निर्माण कम्पनीबाटै असुल गर्ने बाटो खुलेको हो ।
© 2026 All right reserved to khabarcnter.com | Site By : Sobij
