२०८२ भाद्र १४ गते शनिवार
२०८२ भाद्र १४ गते शनिवार
काठमाडौं । नेपाल नागरिक उड्डयन प्राधिकरणले ११ वटा वायुसेवा कम्पनीहरुलाई बक्यौता रकम बुझाउन निर्देशन दिएको छ। उनीहरुले प्राधिकरणलाई ९ करोड ६८ लाख ७४ हजार ३ सय ३० बुझाउन बाँकी रहेको प्राधिकरणले जनाएको छ।
प्राधिकरणले आज जारी गरेको सार्वजनिक सूचनामा ३० दिनभित्रमा उक्त रकम र नियमानुसार लाग्ने विलम्ब शुल्कसमेत बुझाई आफ्नो हरहिसाब चुक्ता गर्न आग्रह गरेको छ ।
३० दिनभित्र पनि रकम बुझाउन नआएमा सञ्चालक, एकाघरका परिवार र जमानी बस्नेहरुको जायजेथाबाट सरकारी बाँकी सरह असुल उपर गर्ने चेतावनी प्राधिकरणले दिएको छ।
रकम नबुझाएमा वायुसेवा सञ्चालक प्राधिकरणको नियमावली २०६७ को नियम ३० को उपनियम(३) बमोजिम भविष्यमा हवाई सेवा सञ्चालन गर्न अनुमति नदिने र अन्य काम कारवाही तथा व्यापार व्यवसायमा सहभागीमा हुन नपाउने गरी कालो सूचीमा राखिने प्राधिकरणले जारी गरिएको सूचनामा बताइएको छ।
बक्यौता रकम सम्बन्धमा कुनै फरक परेको आधार र प्रमाण भएमा पुष्टकारीसहित पेश गरी हिसाब मिलान गर्न पनि आग्रह गरेको छ। नेकोन एयर, शिवानी एयर, अल्पाइन एयर, गोरखा एयर, कर्णाली एयर, माउन्टेन एयरलाईन्सलाई ३० दिने म्याद दिएको छ। ।
यस्तै कस्मिक एयर, साङ्ग्रिला एयर, स्काइलाइन एयरवेज, एयर काष्ठमण्डप र नेपाल एयरवेजलाई शुल्क बुझाउन ३० दिने म्याद दिएको छ। हाल यी एयरलाइन्सहरू सन्चालनमा छैनन् ।
© 2025 All right reserved to khabarcnter.com | Site By : Sobij
