२०८३ मंसिर २ गते बुधवार
काठमाडौं । बङ्गालको खाडीको पश्चिम-मध्य भागमा विकसित भएको शक्तिशाली समुद्री चक्रवात ‘अकभान’ बिस्तारै भारतको आन्ध्र प्रदेशको तटीयतर्फ अघि बढेको छ।
भारतीय मौसम विज्ञान विभाग (आईएमडी) का अनुसार यो चक्रवात आगामी शुक्रबार मध्याह्नतिर आन्ध्र प्रदेश र यानमको नेल्लोर तथा विशाखापट्टनमबीचको तटीय क्षेत्र पार गर्दै जमिनमा ठोक्किने (ल्यान्डफल हुने) सम्भावना छ। चक्रवात तट नजिकिँदै गर्दा यसको अवतरण हुने निश्चित स्थानमा केही फेरबदल हुन सक्ने अनुमान गरिएको छ।
बुधबार बिहानसम्म यो चक्रवात प्रतिघण्टा तीन किलोमिटरको अत्यन्त सुस्त गतिमा उत्तर-उत्तरपश्चिमतर्फ सरिरहेको थियो। हाल यो आँधी चेन्नईबाट ५८० किलोमिटर, मछलीपट्टनमबाट ६१० किलोमिटर, विशाखापट्टनमबाट ६१० किलोमिटर तथा ओडिशाको गोपालपुरबाट ७३० किलोमिटर टाढा समुद्रमा केन्द्रित छ। मौसम पूर्वानुमानअनुसार नोभेम्बर १९ सम्ममा यो अझ शक्तिशाली बनेर ‘अति भीषण चक्रवाती आँधी’ मा रूपान्तरण हुनेछ।
त्यसबेला हावाको गति प्रतिघण्टा १२० देखि १३० किलोमिटर र झोक्का १४५ किलोमिटरसम्म पुग्न सक्ने आकलन गरिएको छ। यद्यपि, तट पार गर्ने समयमा भने यसको तीव्रता केही घटेर हावाको गति प्रतिघण्टा १०० देखि ११० किलोमिटर र अधिकतम झोक्का १२० किलोमिटरसम्म रहने छ।
तीव्रता केही घटे पनि चक्रवात निकै शक्तिशाली रहने भएकाले भारी वर्षा, बाढी तथा तेज हावाका कारण ठूलो क्षति हुनसक्ने चेतावनी मौसमविद्हरूले दिएका छन्। यसको प्रभावले नोभेम्बर १९ र २० मा तटीय आन्ध्र प्रदेशका धेरैजसो भूभागमा भारीदेखि धेरै भारी र केही स्थानमा अति भारी वर्षा हुने सम्भावना छ। यसैगरी रायलसीमा क्षेत्रमा नोभेम्बर १९ र २० तथा पूर्वी तेलङ्गानामा नोभेम्बर २० र २१ मा भारी वर्षाको पूर्वानुमान गरिएको छ। समुद्र अशान्त रहने भएकाले माछा मार्ने गतिविधिमा पूर्ण रोक लगाइएको छ।
जोखिम व्यवस्थापनका लागि आन्ध्र प्रदेश राज्य विपद् व्यवस्थापन प्राधिकरण (एपिएसडीएमए) र रियल-टाइम गभर्नेन्स सोसाइटी (आरटीजीएस) ले चक्रवातको गतिलाई चौबीसै घण्टा निगरानी गरिरहेका छन्। सम्भावित विपद्बाट उद्धारका लागि राष्ट्रिय विपद् प्रतिकार्य बल (एनडीआरएफ) का १३ टोली, राज्य विपद् प्रतिकार्य बल (एसडीआरएफ) का ११ टोली तथा स्थानीय दमकल सेवालाई तयारी अवस्थामा राखिएको छ। एपिएसडीएमएका प्रबन्ध निर्देशक तथा आरटीजीएसका प्रमुख कार्यकारी अधिकृत प्रखर जैनले तटीय बासिन्दालाई अनावश्यक यात्रा नगर्न र किसानहरूलाई पूर्वसावधानीका उपायहरू अपनाउन आग्रह गरेका छन्। उनले मानवीय तथा भौतिक क्षति रोक्न सबै संयन्त्रलाई आवश्यक निर्देशन दिइएको बताए।
यसैबिच, चक्रवात ‘अकभान’ थप शक्तिशाली बन्दै गएपछि आन्ध्र प्रदेशकी गृहमन्त्री अनिताले अमरावतीमा उच्च अधिकारीहरूसँग समीक्षा बैठक गरेकी छन्। उनले सम्पूर्ण राज्य संयन्त्रलाई आगामी ४८ घण्टासम्म पूर्ण सतर्क रहन निर्देशन दिँदै सबै जिल्ला तथा मण्डल तहका नियन्त्रण कक्षहरू २४सै घण्टा सञ्चालन गर्न आदेश दिइन्।
तल्लो तटीय र जोखिमयुक्त क्षेत्रका बासिन्दालाई तत्काल सुरक्षित पुनर्वास केन्द्रमा सार्न निर्देशन दिँदै गृहमन्त्री अनिताले भनिन्, ‘स्थानीय प्रशासनले जमिनको अवस्था निरन्तर अनुगमन गर्दै क्षति हुन नदिन आवश्यक सम्पूर्ण राहत तथा उद्धारका काम तत्काल अघि बढाउनुपर्छ।’
© 2026 All right reserved to khabarcnter.com | Site By : Sobij