२०८३ आश्विन १८ गते आइतवार
२०८३ आश्विन १८ गते आइतवार
.gif)
काठमाडौं। अस्ट्रेलियाको बजेट एयरलाइन्स जेटस्टारका करिब १ हजार कर्मचारीले तलब वृद्धि र सेवा सुविधाको माग गर्दै शुक्रबारदेखि चरणबद्ध औद्योगिक आन्दोलन सुरु गरेका छन्।
अस्ट्रेलियन सर्भिसेज युनियन (एएसयू) का अनुसार, जेटस्टार व्यवस्थापनसँग तलब तथा कार्यस्थलका सुविधासम्बन्धी वार्ता निष्कर्षविहीन भएपछि कर्मचारीले विभिन्न प्रमुख विमानस्थलमा एक(एक घण्टाका लागि काम रोक्ने कार्यक्रम तय गरेका हुन्।
शुक्रबार सिड्नी, मेलबर्न, ब्रिस्बेन, एडिलेड, केर्न्स, कुलाङ्गाटा र एभालोन विमानस्थलमा एक घण्टाका काम रोक्ने कार्यक्रम छ।
यससँगै कर्मचारीले नियमित यात्रु घोषणा र फोन गर्ने तथा उडान ढिलाइ वा रद्द भएपछि पुनःव्यवस्थापन गर्ने केही कामसमेत नगर्ने बताएका छन्। सुरक्षा तथा यात्रुको कल्याणसँग सम्बन्धित घोषणा भने यसबाट छुट दिइएको छ।
युनियनले जेटस्टारले प्रस्ताव गरेको तलब वृद्धि बढ्दो जीवनयापन लागतको तुलनामा पर्याप्त नभएको जनाएको छ।
युनियनका अनुसार कम्पनीले हाल २.१ प्रतिशत तलब वृद्धि प्रस्ताव गरेको छ भने अप्रिल २०२७ देखि थप वृद्धि गरी ३ प्रतिशत पुर्याउने प्रस्ताव गरेको छ। यसमा विगत अवधिको तलब समायोजन तथा अन्य सुविधा पनि समावेश छन्।
आन्दोलन शुक्रबारदेखि आइतबारसम्मको व्यस्त यात्रा अवधिमा परेको छ। यसै समयमा अस्ट्रेलियामा विद्यालय बिदा र अक्टोबरको लामो सप्ताहन्तसँगै ४ अक्टोबरमा सिड्नीमा एनआरएल ग्रान्ड फाइनल हुँदैछ। सिड्नी विमानस्थलले शुक्रबार करिब ९४ हजार यात्रु टर्मिनल २ र ३ बाट यात्रा गर्ने अनुमान गरेको छ।
यसैबीच, जेटस्टारले आन्दोलनका कारण उडान सञ्चालनमा ठूलो असर नपर्ने जनाएको छ। कम्पनीले आकस्मिक व्यवस्थापन योजना तयार पारेको भन्दै उडानहरू सामान्य रूपमा सञ्चालन हुने अपेक्षा गरेको छ। यद्यपि, यात्रुहरूलाई विमानस्थल जानुअघि आफ्नो उडानको पछिल्लो अवस्था जाँच गर्न आग्रह गरिएको छ।
युनियनले शुक्रबार २ अक्टोबरदेखि आइतबार ४ अक्टोबरसम्म केही योग्य कारोबारमा अतिरिक्त ब्यागेज, सिट परिवर्तन र ढिला शुल्कलगायतका शुल्क शून्यमा प्रशोधन गर्ने औद्योगिक कदमसमेत घोषणा गरेको छ।
© 2026 All right reserved to khabarcnter.com | Site By : Sobij
