२०८३ आश्विन १३ गते मंगलवार
२०८३ आश्विन १३ गते मंगलवार
.gif)
काठमाडौं । अविरल वर्षाका कारण पहिरो खसेर अवरुद्ध बनेको पृथ्वी राजमार्गअन्तर्गत मलेखु–मुग्लिङ सडकखण्ड खुलाउन १० वटा हेभी इक्विपमेन्ट परिचालन गरिएको छ। सडक डिभिजन कार्यालय र विपद् व्यवस्थापन टोलीको समन्वयमा पहिरो, लेदो तथा ढुंगा–माटो पन्छाउने काम तीव्र पारिएको हो।
भारी वर्षासँगै विभिन्न स्थानमा ठूलो पहिरो खसेपछि मलेखुदेखि मुग्लिङसम्मको सडकखण्डमा सवारी आवागमन प्रभावित भएको छ। सडक अवरुद्ध हुँदा यात्रु तथा सवारीसाधन बाटोमै रोकिएका छन्।
अवरुद्ध सडक खुलाउन जोखिमयुक्त बिन्दुहरूमा डोजर, एक्साभेटर र लोडरसहित १० वटा भारी मेसिन एकैसाथ परिचालन गरिएको छ। लगातार वर्षा भइरहेकाले माथिबाट ढुंगा खस्ने जोखिमबीच पनि प्राविधिक टोलीले पहिरो पन्छाउने काम गरिरहेको छ।
सम्भव भएसम्म सडकलाई एकतर्फी रूपमा भए पनि तत्काल सञ्चालनमा ल्याएर रोकिएका सवारीसाधनलाई गन्तव्यतर्फ पठाउने तयारी भइरहेको स्थानीय प्रशासनले जनाएको छ।
पृथ्वी राजमार्ग काठमाडौंलाई देशका विभिन्न भागसँग जोड्ने प्रमुख सडक भएकाले अवरोध हुँदा यात्रु आवागमन तथा ढुवानी प्रणालीमा समेत असर परेको छ। सुरक्षा निकाय तथा सडक कार्यालयले पहिरोको जोखिम रहेका सडकमा अनावश्यक यात्रा नगर्न र यात्रा अघि सडकको अवस्थाबारे जानकारी लिन सर्वसाधारणलाई आग्रह गरेका छन्।
© 2026 All right reserved to khabarcnter.com | Site By : Sobij
