२०८३ आश्विन ८ गते बिहिवार
२०८३ आश्विन ८ गते बिहिवार
.gif)
काठमाडौं । देशका अधिकांश भूभागमा भइरहेको वर्षा आगामी असोज ११ गतेसम्म कायम रहने मौसमविद्ले बताएका छन्। बंगालको खाडीबाट आएको न्यून चापीय प्रणाली र पश्चिमी वायुको संयुक्त प्रभावका कारण अहिले विभिन्न क्षेत्रमा हल्कादेखि भारी वर्षा भइरहेको हो।
मौसम पूर्वानुमान महाशाखाका मौसमविद् रोजन लामिछानेका अनुसार पछिल्लो २४ घण्टामा कोशी, मधेस, बागमती, गण्डकी र लुम्बिनी प्रदेशका धेरै स्थानमा वर्षा भएको छ। लुम्बिनीका पाल्पा, अर्घाखाँची र कपिलवस्तु आसपासका केही क्षेत्रमा १४० मिलिमिटरभन्दा बढी वर्षा मापन भएको छ। पाल्पाका केही केन्द्रमा वर्षा १६० मिलिमिटरभन्दा माथि पुगेको उनले बताएका छन्।
असोज ८ र ९ गते कोशीदेखि लुम्बिनीसम्मका अधिकांश क्षेत्रमा हल्कादेखि मध्यम तथा केही स्थानमा भारी वर्षाको सम्भावना छ। शुक्रबारसम्म वर्षाको प्रभाव कर्णाली र सुदूरपश्चिमसम्म फैलिन सक्ने अनुमान गरिएको छ।
असोज १० गतेदेखि पूर्वी क्षेत्रमा वर्षा घट्दै जाने भए पनि लुम्बिनीका पश्चिमी भागसहित कर्णाली र सुदूरपश्चिममा वर्षाको प्रभाव बढ्न सक्नेछ। असोज ११ गतेपछि भने देशभर वर्षा क्रमशः कमजोर हुने अनुमान छ।
लगातारको वर्षाका कारण पहाडी तथा कमजोर भौगर्भिक संरचना भएका क्षेत्रमा पहिरो र नदी–खोला आसपास बाढीको जोखिम बढ्ने भएकाले सतर्क रहन मौसमविद्ले आग्रह गरेका छन्। उच्च पहाडी तथा हिमाली क्षेत्रमा पदयात्रामा रहेका पर्यटकलाई पनि मौसम अनुकूल नभएसम्म सुरक्षित स्थानमा बस्न सुझाव दिइएको छ।
© 2026 All right reserved to khabarcnter.com | Site By : Sobij
