२०८३ आश्विन ८ गते बिहिवार
२०८३ आश्विन ८ गते बिहिवार
.gif)
काठमाडौं । जल तथा मौसम विज्ञान विभागको बाढी पूर्वानुमान शाखाले आगामी पाँच दिन देशका प्रमुख नदी तथा खोलामा जलसतह बढ्ने प्रक्षेपण गर्दै सतर्कता अपनाउन आग्रह गरेको छ।
कोशी, नारायणी, कर्णाली र महाकालीसहितका नदी तथा सहायक नदीमा बहाव बढ्ने अनुमान गरिएको छ। केही क्षेत्रमा बाढीको जोखिम मध्यमदेखि उच्च तहसम्म पुग्ने शाखाले जनाएको छ।
विशेषगरी असोज १० गते बडिगाड–रुद्रबेनी र कालीगण्डकी–कुमालगाउँ क्षेत्रमा बाढीको उच्च जोखिम रहेको बताइएको छ। कर्णाली चिसापानी तथा ठूलीभेरी रिम्ना क्षेत्रमा पनि शनिबार र आइतबार उच्च जोखिम देखिएको छ।
बागमती, पूर्वी राप्ती, बाणगंगा, पश्चिम राप्ती र बबई नदीमा समेत जलसतह बढ्ने अनुमान छ। असोज १० र ११ गते केही क्षेत्रमा उच्च जोखिम पुग्ने भएकाले नदी तथा खोलाका तटीय क्षेत्रमा बसोबास गर्ने र यात्रा गर्नेहरूलाई विशेष सावधानी अपनाउन आग्रह गरिएको छ।
यस्तै, साना खोलामा आकस्मिक बाढीको जोखिमसमेत बढेको छ। गुल्मी, पर्वत, बागलुङ, प्युठान, दाङ, रोल्पा, रुकुम पूर्व–पश्चिम, जाजरकोट, सल्यान, बाँके, बर्दिया, सुर्खेत र दैलेख गरी १४ जिल्लामा शुक्रबारदेखि शनिबारसम्म उच्च जोखिम रहेको शाखाले जनाएको छ।
विभागले बाढीसम्बन्धी पछिल्लो जानकारीका लागि हरेक बिहान ८ बजे बाढी बुलेटिन हेर्न तथा टोल फ्री नम्बर ११५५ मा सम्पर्क गर्न आग्रह गरेको छ।
© 2026 All right reserved to khabarcnter.com | Site By : Sobij
