२०८३ आश्विन ८ गते बिहिवार
२०८३ आश्विन ८ गते बिहिवार
.gif)
काठमाडौं । कञ्चनपुरका भन्सार अधिकृतले कैलालीका सशस्त्र प्रहरी उपरीक्षक (एसपी) लाई धम्क्याएको भनिएको अडियो सार्वजनिक भएपछि उक्त विषय प्रतिनिधिसभामा उठेको छ ।
बिहीबारको प्रतिनिधिसभा बैठकमा आकस्मिक समयमा राष्ट्रिय स्वतन्त्र पार्टी (रास्वपा)की सांसद टिका संग्रौला (ज्वाला)ले घटनाबारे सरकारको ध्यानाकर्षण गराएकी हुन् ।
संग्रौलाका अनुसार भन्सारमा गाडी नियन्त्रणमा लिएको विषयलाई लिएर भन्सार अधिकृतले सुरक्षा निकायका अधिकारीसँग धम्कीपूर्ण भाषा प्रयोग गरेको विषय सार्वजनिक भएको छ । सार्वजनिक अडियोमा ती अधिकारीले ‘स्वाट्टै हान्छु’ जस्ता शब्द प्रयोग गरेको सुनिएको उनले बताइन् ।
उनले राज्यका उच्च पदस्थ अधिकारीलाई नै धम्की दिने शैलीप्रति आपत्ति जनाउँदै घटनाको तत्काल छानबिन गर्न सरकारसँग माग गरिन् ।
सीमा क्षेत्रमा राजस्व चुहावट नियन्त्रणका लागि खटिएका सुरक्षाकर्मी र भन्सार प्रशासनबीच समन्वय र मर्यादित वातावरण आवश्यक रहेको संग्रौलाको भनाइ छ । यस्तो घटनाले राज्य संयन्त्रका निकायबीचको समन्वयमा प्रश्न उठाउने भन्दै उनले सम्बन्धित अधिकारी दोषी ठहरिए कानुनअनुसार कारबाही गर्न माग गरिन् ।
साथै, सीमा क्षेत्रमा कार्यरत सुरक्षा निकाय र राजस्व प्रशासनबीच जिम्मेवारी तथा कार्यसम्पादनमा देखिने विवाद समाधान गर्न सरकारले आवश्यक समन्वयको व्यवस्था मिलाउनुपर्ने उनले बताइन् ।
© 2026 All right reserved to khabarcnter.com | Site By : Sobij
