२०८३ आश्विन १९ गते सोमवार
२०८३ आश्विन १९ गते सोमवार
.gif)
काठमाडौं । काठमाडौं उपत्यकामा गुड्ने सार्वजनिक यातायात कहाँ आइपुग्यो र आफू भएको ठाउँमा आइपुग्न कति समय लाग्छ भन्ने प्रत्यक्ष जानकारी दिने उद्देश्यले ‘केटीएम पब्लिक ट्रान्सपोर्ट’ मोबाइल एप सार्वजनिक गरिएको छ ।
‘सङ्घीय राजधानी सहरी क्षेत्र सार्वजनिक यातायात परिषद्’को तेस्रो बैठकका अवसरमा काठमाडौं महानगरपालिकाकी कार्यवाहक प्रमुख सुनिता डङ्गोलले उक्त एप्लिकेसन सार्वजनिक गरेकी हुन् । यस एपमार्फत हाल जीपीएस जडान भएका करिब १ हजार २०० सार्वजनिक सवारी साधनको जानकारी लिन सकिनेछ ।
सङ्घीय राजधानी सहरी क्षेत्र सार्वजनिक यातायात प्राधिकरणले आगामी दिनमा अन्य सवारी साधनमा पनि यो प्रविधि जडान गर्दै लैजाने योजना बनाएको छ ।
बैठकमा बोल्दै कार्यवाहक प्रमुख डङ्गोलले उपत्यकाको सार्वजनिक यातायात प्रणालीलाई सरल, सहज र पहुँचयुक्त बनाउनुपर्नेमा जोड दिइन् । विद्यार्थीका लागि बिहान सबेरैदेखि गाडी चलाउन र रात्रिकालीन सेवा विस्तार गर्न स्थानीय तहहरूबिच वित्तीय साझेदारी आवश्यक रहेको उनको भनाइ थियो ।
यस्तै, परिषद्का उपाध्यक्ष एवं ललितपुर महानगरपालिकाका प्रमुख चिरीबाबु महर्जनले यात्रुलाई सार्वजनिक बस चढ्दा सहज महसुस गराउने प्रणालीको आवश्यकता औँल्याए । उनले सार्वजनिक यातायातको सुधारका लागि परिषद्ले आकार बदल्न सक्ने क्षमता राख्ने भन्दै उक्त क्षमताको भरपुर प्रयोग गर्नुपर्ने बताए ।
© 2026 All right reserved to khabarcnter.com | Site By : Sobij
