समितिमा बोल्ने भाषामा ध्यान दिन रुलिङ

श्रावण २९, २०८३ शुक्रवार

225

काठमाडौं । कानुन न्याय, तथा मानव अधिकार समिति सभापति समिक्षा बास्कोटाले समितिमा बोल्दा मर्यादित भाषा प्रयोग गर्न रुलिङ गरेकी छन् ।

शुक्रबारको समिति बैठकमा विभिन्न कारागार तथा हिरासतमा रहेका थुनुवा एवं कैदीबन्दीहरूको मानव अधिकारको अवस्थासम्बन्धी निरीक्षण तथा अवलोकन उपसमितिको प्रतिवेदन २०८३ उपर छलफल भइरहेको छ ।

बाल सुधार गृहमा रहेका बालबालिकाहरूको मानव अधिकारको अवस्थासम्बन्धी निरीक्षण तथा अवलोकन उपसमितिबाट समितिमा पेस भएको प्रतिवेदन २०८३ पारित गर्ने तयारी छ ।

समितिमा गृहमन्त्री सुधन गुरुङ, कानुनमन्त्री सोविता गौतम, प्रहरी महानिरीक्षक दानबहादुर कार्कीलगतायत सहभागी छन् ।

"समितिमा हामीले आमन्त्रित गर्ने व्यक्तिहरू कुनै न कुनै संगठनका प्रमुख, कुनै न कुनै मन्त्रालयदेखि लिएर निकायका प्रमुख रहेर काम गरिरहनुभएको स्थिति भएकोले हामीले यहाँनेरी बोलिने भाषा, हामीले प्रयोग गरिने शब्द र हामीले प्रयोग गर्ने व्यवहार यो सम्पूर्ण आम नागरिकले पनि हेरिराख्नुभएको हुन्छ," सभापति बास्कोटाले भनिन् ।

उनले विषयान्तर नहुन भनिन् । "यो हिसाबले समितिमा बोल्ने विषयमा विषयान्तर नभइकन र हामीले प्रयोग गर्ने भाषामा पनि त्यत्तिकै सचेत र संवेदनशील भएर विषय उठान गर्दिनुहुन्छ भनेर माननीय सदस्यहरू र आमन्त्रित सम्पूर्ण व्यक्तित्वहरूमा हार्दिक अनुरोध गर्न चाहन्छु," उनले भनिन् ।