२०८३ श्रावण २९ गते शुक्रवार
२०८३ श्रावण २९ गते शुक्रवार
.gif)
काठमाडौं । नेपाल एसोसिएसन अफ टुर एन्ड ट्राभल एजेन्ट्स (नाट्टा) को नयाँ कार्यसमिति चयनका लागि आज निर्वाचन हुँदैछ । वर्तमान कार्यसमितिको कार्यकाल सकिएसँगै आगामी तीन वर्षका लागि नयाँ नेतृत्व चयन गर्न निर्वाचन हुन लागेको हो ।
काठमाडौंस्थित सोल्टी होटलमा अधिवेशन आयोजना गरिएको छ । उद्घाटन सत्रपछि बन्द सत्र सुरु हुने र त्यसपछि निर्वाचन प्रक्रिया अघि बढाइने कार्यतालिका रहेको छ ।
नयाँ कार्यसमितिका लागि यसपटक तीनवटा प्यानल चुनावी मैदानमा छन् । भरतजंग पाण्डे, जिश्वा तुलाधर श्रेष्ठ र युविका भण्डारीको नेतृत्वमा छुट्टाछुट्टै प्यानलले उम्मेदवारी दिएका छन् ।
कोभिड–१९ महामारी र पछिल्लो आर्थिक चुनौतीपछि पुनः लयमा फर्किन संघर्ष गरिरहेको पर्यटन क्षेत्रलाई नयाँ दिशा दिने विषय निर्वाचनका प्रमुख एजेन्डा बनेका छन् ।
भरतजंग पाण्डे नेतृत्वको प्यानलले ‘सशक्त नाट्टा, समृद्ध पर्यटनः सदस्यसँगै, सदस्यका लागि’ भन्ने नारासहित संस्थागत सुधार, सदस्यको हित र परम्परागत गुटबन्दी अन्त्यलाई मुख्य मुद्दा बनाएको छ ।
त्यस्तै, जिश्वा तुलाधर श्रेष्ठ नेतृत्वको प्यानलले नाट्टालाई प्रविधिमैत्री, स्मार्ट र सुरक्षित संस्था बनाउने एजेन्डा अघि सारेको छ । डिजिटल रूपान्तरण र आधुनिक पर्यटन व्यवस्थापनलाई प्राथमिकतामा राखिएको छ ।
यता युविका भण्डारी नेतृत्वको प्यानलले ‘पर्यटन उठे, नेपाल उठ्छ’ भन्ने नारासहित पर्यटन क्षेत्रलाई राष्ट्रिय प्राथमिकताको उद्योगका रूपमा स्थापित गर्ने, अन्तर्राष्ट्रिय विमानस्थलको प्रभावकारी सञ्चालन र साना व्यवसायीका लागि राहत योजनालाई चुनावी मुद्दा बनाएको छ ।
तीनवटै प्यानलमा अनुभवी पर्यटन व्यवसायीहरूको सहभागिता रहेको छ । महिला नेतृत्व रहेका दुई प्यानलका कारण पनि यसपटकको निर्वाचन थप रोचक बनेको छ ।
नाट्टाको नयाँ नेतृत्वका लागि हुने त्रिकोणात्मक प्रतिस्पर्धालाई संस्थाको पुरानो कार्यशैली र नयाँ सोचबीचको प्रतिस्पर्धाका रूपमा समेत हेरिएको छ ।
© 2026 All right reserved to khabarcnter.com | Site By : Sobij
