२०८३ आश्विन १३ गते मंगलवार
२०८३ आश्विन १३ गते मंगलवार
.gif)
काठमाडौं । जनआस्था साप्ताहिकका प्रधान सम्पादक तथा वरिष्ठ पत्रकार किशोर श्रेष्ठलाई समाचार लेखेकै आधारमा प्रहरीले पक्राउ गरेको भन्दै नेपाल मिडिया सोसाइटीले गम्भीर आपत्ति जनाएको छ ।
सोसाइटीले विज्ञप्ति जारी गर्दै समाचारको विषयमा कुनै गुनासो वा आपत्ति भए प्रचलित कानुन र प्रेससम्बन्धी स्थापित प्रक्रियामार्फत समाधान खोजिनुपर्नेमा समाचार लेखेकै आधारमा पक्राउ गर्नु प्रेस तथा अभिव्यक्ति स्वतन्त्रताको मूल मर्मविपरीत भएको जनाएको छ ।
नेपालको संविधानले सुनिश्चित गरेको प्रेस तथा अभिव्यक्ति स्वतन्त्रता, सूचनाको हक र स्वतन्त्र पत्रकारिताको अधिकार लोकतान्त्रिक व्यवस्थाका आधारस्तम्भ भएको सोसाइटीले उल्लेख गरेको छ ।
पत्रकारलाई समाचार प्रकाशनकै कारण पक्राउ गर्ने वा अनुसन्धानका नाममा त्रसित बनाउने कार्यले स्वतन्त्र पत्रकारिताको वातावरणमा नकारात्मक असर पार्ने र निर्भीक पत्रकारितालाई कमजोर बनाउने सोसाइटीको भनाइ छ ।
नेपाल मिडिया सोसाइटीका महासचिव बोधराज त्रिपाठीले पत्रकारिता तथा प्रकाशित समाचारसँग सम्बन्धित विषयमा कानुनी उपचार खोज्दा प्रेस स्वतन्त्रता, पत्रकारको व्यावसायिक अधिकार र स्थापित मान्यताको सम्मान हुनुपर्ने बताए ।
सोसाइटीले पत्रकार किशोर श्रेष्ठलाई तत्काल र निशर्त रिहा गर्न सम्बन्धित निकायसँग माग गरेको छ । साथै, प्रकाशित समाचारका विषयमा कुनै कानुनी प्रश्न वा आपत्ति भए कानुनी प्रक्रियामार्फत समाधान खोज्न आग्रह गर्दै प्रेस स्वतन्त्रतामाथि हुने कुनै पनि दबाब, हस्तक्षेप वा दमनविरुद्ध खबरदारी गरिरहने जनाएको छ ।
© 2026 All right reserved to khabarcnter.com | Site By : Sobij
