काठमाडौं । राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रले नेपाली कांग्रेसका नेता डा शेखर कोइरालालाई खुला पत्र लेख्दै गर्न सक्ने ठाउँमा हुँदा पनि किन केही नगरेको भन्दै प्रश्न गरेका छन् ।

सामाजिक सञ्जाल फेसबुकमार्फत मिश्रले ९ बुँदे पत्र भन्दै कांग्रेस सभापति बन्न पाइन्न कि, प्रधानमन्त्री बन्न पाइन्न कि भनेर आत्मकेन्द्रित चिन्तनबाट ग्रस्त नहुन भनेका हुन् ।

मिश्रको पत्र :

– देशलाई अभिभावकको खाँचो छ ।
– देशको राष्ट्रियता अत्यन्त नाजूक अवस्थामा छ ।
– राष्ट्रियता र प्रजातन्त्रसँगै लैजान नसके नेपाल बच्दैन ।
– प्रजातन्त्र/लोकतन्त्र ‘छाडातन्त्र’ भइसकेको छ ।

‘पत्रको शुरू नै यसरी गरौँ देशको अवस्था त्यति खराब छ भने, तपाईँ गर्न सक्ने ठाऊँमा भएको मान्छे, के हेरेर बस्नुभएको ? कांग्रेस सभापति बन्न पाइन्न कि, प्रधानमन्त्री बन्न पाइन्न कि भनेर आत्मकेन्द्रित चिन्तनबाट तपाईँसमेत ग्रस्त भएको देख्दा, मेरो तपाईँप्रतिको सम्मानमै प्वाल पर्न लागिसक्यो, जुन म चाहन्न ।’

वीपी कोइरालाको सच्चा अनुयायी भएरसबैभन्दा माथि देशलाई राख्ने कि पदलाई ? भन्ने मिश्रको प्रश्न छ ।

‘के वीपीले त्यही सिकाएका थिए तपाईँलाई ?  विचारभन्दा माथि देशलाई राखेका होइन, वीपीले ?’ उनले भनेका छन्, ‘चुनावमा नयाँ–नयाँ मिले भने खुब बन्नुहोला तपाईँ प्रधानमन्त्री ! सबै नयाँ नमिल्दा त तपाईँको पालो नआउला जस्तो देख्खिसक्यो । तपाईँचाहिँ ‘आकाशको फल’ हेरेर जहिले पनि ल्याङल्याङ कुरा गरेर बसिराख्नोस् ।’

मिश्रका अन्य बुँदाहरुः

– वीपीजस्तै राजनेता हुनेभए ड्याम्म एउटा पत्रकार सम्मेलन गर्नोस्, ‘यो, यो, यो’ कारणले देश र काँग्रेसलाई ‘वीपीपथ’ मा लैजानै पर्नेभयो भन्नुस् । प्रचण्डको कमिजको फेर समातेर नबस्नोस् । तपाईँ सहजताका साथ कांग्रेस सभापति र प्रधानमन्त्री दुबै बन्नुहुन्छ ।

–प्रचण्डमार्गी काँग्रेसी, भूराजनीतिमा पोख्त छिमेकीले के भन्छन् र सभापति/प्रधानमन्त्री बन्न पाउँला/नपाउँला भनेर सोच्न छोडिदिनोस् ।

– छिमेकीले पनि जेन–जी विद्रोहपछि नेपालमा राजसंस्था भएन भने त्यसको असर अब उनीहरूलाई समेत पर्छ भन्ने अलिअलि बुझिसके । अब केही समयमा पुरै बुझ्नेछन् । अनि त्यसपछि तपाईँ ‘मैले त राजालाई पूर्वराजा भन्दिनँ भनेकै थिएँ नि’ भन्दै लुरूक्क परेर ‘मार्ग परिवर्तन’ गर्ने होला, होइन ?

– यस्तो ल्याङ्ग्रे पाराले पनि राजनेता भइन्छ ? यो पाराले तपाईँ प्रधानमन्त्री नै भए पनि तपाईँ सिङ्गो नेपालको होइन, प्रचण्डपथको अर्थहीन प्रधानमन्त्री हुने हो । तपाईँलाई देशको भन्दा प्रधानमन्त्री पदको माया ?

– देश यस्तो अवस्थामा पुग्दा पनि कोइरालाको रगत र वीपीको आस्था बोकेको मान्छेको हालत यस्तो देख्दा मलाई दुख लागेको छ !

–देश नवीन समझदारीमा जाने लगभग निश्चित छ । गएन भने विस्तारै या अनपेक्षितरूपमा, तपाईँले नै भने झैँ अस्तित्वको संकटमै जाने हो । त्यसैले, ठूलो, र वीपीको दलको नाताले नवीन समझदारीको नेतृत्व गरेर राजनेता बन्नोस् । होइन भने प्रचण्डको फेर समातेर हल्लिरनोस ! विराटनगर गएर ‘के सोचेँ मैले, के भयो अहिले’ भनेर गीत गाएर बस्नोस् ।

–कि प्रष्ट भन्नुस्, म प्रचण्डवादी हुँ भनेर, कि प्रष्ट भन्नुस्, म वीपीवादी हुँ भनेर । यता पनि ठिक्क उता पनि ठिक्कको राजनीति तपाईँलाई सुहाउँदैन । यस्तो ल्याङल्याङे पाराले संसारमा कोही पनि राजनेता भएका छैन । बाँकी तपाईँको इच्छा !

तपाईँको शुभचिन्तक
रवीन्द्र मिश्र