काठमाडौं । केपी ओली नेतृत्वको सरकारले भूमि आयोगको नाममा जिल्ला जिल्लामा आफ्ना समर्थकहरुलाई भर्ति गरी सुरु गरेको अभियान खेलकुद र युवा परिषद हुँदै किसान आयोगसम्म आइपुगेको छ । प्रधानमन्त्री ओलीले किसान आयोगको पदाधिकारी नियुक्तिका लागि कषि तथा पशुपंक्षी मन्त्री पद्मा आर्यालको अध्यक्षतामा सिफारिस समिति बनाएका थिए । मन्त्री अर्यालको नेतृत्वमा कृषि मन्त्रालयका सचिव योगेन्द्रकुमार कार्की र विज्ञका रुपमा कृषि विश्वविद्यालय सेवा आयोगका अध्यक्ष कल्याणी मिश्र सदस्य रहेको सिफारिस समितिले आज वा भोलि अध्यक्षमा प्रेम दंगाल र सदस्यहरुरुमा पुष्पा भूसाल लुईटेलसहितको नाम सिफारिस गर्दैछ ।

प्रधानमन्त्री ओलीलाई विगत लामो समयदेखि गुट बनाउन सहयोग गर्दैआएका दंगाल यसअघि युवा स्वरोजगारको अध्यक्षका रुपमा नियुक्ति खाइसकेका हुन् । अब उनलाई राज्यमन्त्रीसरहको सुविधा दिएर किसान आयोगको अध्यक्षमा नियुक्ति गर्न लागिएको छ । मन्त्री अर्याल नेतृत्वको समितिले उनलाई नै अध्यक्षका रुपमा सिफारिस गर्ने संभावना प्रबल रहेको छ । प्रधानमन्त्री ओलीले सुरेन्द्रमोहन शर्मालाई अध्यक्षमा नियुक्ति गर्ने आश्वासन दिए पनि उनी प्रलोभनमा नपरेपछि दंगालले मौका पाउने भएका छन् ।

आयोगको सदस्यमा  मन्त्री पदमा अर्यालका निजी सचिव टेकप्रसाद लुईटेलकी पत्नी पुष्पा भूसाल लुईटेलको सिफारिस गरिएको छ । उपसचिव लुईटेल मन्त्री अर्यालका भूमिब्यवस्था मन्त्रालयदेखिकै निजी सचिव हुन् । मन्त्री अर्यालका लागि सरुवा बढुवा र ठेक्कापट्टामा अर्थ संकलन गर्ने भूमिका राम्रो खेलेबापत यसअघि उनकी पत्नी पुष्पालाई लुम्बिनी प्रदेश योजना आयोगको सदस्यमा नियुक्ति गरिएको छ ।

एमालेमा बर्षौ दुःख गरेकालाई उपेक्षा गर्दै मन्त्रीका पीएका श्रीमतीलाई खातमाथि खात नियुक्ति दिन पदमा अर्याल लागेकी छन् । गोमालमान श्रेष्ठसँग चुनाव लड्दा ठूलो रकम खर्च भएकाले त्यो असुली नभएको भन्दै उनी पीएका श्रीमतीलाई एकपछि अर्को नियुक्ति दिंदैछिन् । 

प्रदेश योजना आयोगबाट अब पीए पत्नी पुष्पालाई किसान आयोगमा बिशिष्ट श्रेणीको सुविधा पाउनेगरी किसान आयोगमा नियुक्तिका लागि मन्त्री अर्यालले सिफारिस गरेकी छन् ।

हाल लुम्बिनी प्रदेश योजना आयोगकी सदस्य पुष्पा भूसाल लुईटेलले आफूले किसान आयोगको सदस्यको लागि आवेदन दिएको बताइन् । उनले कृषिमन्त्री पदमा अर्यालका निजी सचिव टेकप्रसाद लुईटेल आफ्नो श्रीमान भएको पनि स्वीकारिन् ।

किसान आयोगको नियुक्ति सिफारिसका बारेमा सिफारिस समितिका सदस्य कृषि मन्त्रालयका सचिव कार्कीसँग प्रतिक्रियाका लागि पटक पटक प्रयास गर्दा पनि सम्पर्क हुन सकेन ।