२०८२ कार्तिक २१ गते शुक्रवार
२०८२ कार्तिक २१ गते शुक्रवार
काठमाडौं । प्रमुख प्रतिपक्षी दल नेपाली कांग्रेसको पदाधिकारी एवं पूर्वपदाधिकारीको बैठक आज बस्ने भएको छ । मुलुकको पछिल्लो राजनीतिक घटनाक्रम र पार्टीभित्रको आन्तरिक छलफलका लागि आज दिउँसो ३ बजे पदाधिकारी एवं पूर्व पदाधिकारी बैठक सभापति देउवा निवास बूढानीलकण्ठमा बस्नेछ ।
कांग्रेसका सूचना, सञ्चार तथा प्रचार विभागका प्रमुख मीन विश्वकर्माले बैठकमा मुलुकको पछिल्लो राजनीतिक घटनाक्रम, नेविसङ्घलगायत भ्रातृ संस्थाका म्याद सकिएको विषय, पार्टीको गतिविधिलगायत समसामयिक विषयमा छलफल हुने जानकारी दिए ।
बैठकमा असार १५ गतेबाट समयावधि सकिएका भातृ संस्था, गठन हुन नसकेको विभाग, केन्द्रीय समिति बैठकको मिति र समसामयिक विषयमा छलफल हुनेसमेत प्रचार विभागका प्रमुख विश्वकर्माले बताए ।
आजको बैठकमा यसअघि सत्तारूढ नेकपा (एमाले) अध्यक्ष केपी शर्मा ओलीसँग कांग्रेस सभापति शेरबहादुर देउवाले गरेको सघन भेटवार्तालाई लिएर पनि छलफल हुने बुझिएको छ ।
यसबारेमा देउवाले बैठकमा ब्रिफिङ गर्ने बताइएको छ । पछिल्ला केही दिनयता देउवा र ओलीले पटकपटक भेटवार्ता गर्दै आएका छन् । सत्ता र प्रतिपक्षी दलका शीर्ष नेताको भेटवार्तालाई लिएर सत्ता समीकरण फेरबदल आउन सक्ने आकलन राजनीतिक वृत्तमा गरिएको छ ।
© 2025 All right reserved to khabarcnter.com | Site By : Sobij
