२०८२ माघ १२ गते सोमवार
२०८२ माघ १२ गते सोमवार
काठमाडौं । चैतको दोस्रो साता राष्ट्रपति विद्यादेवी भण्डारी बंगलादेशको दुई–दिने भ्रमणमा जाने कार्यक्रम निश्चित भएको सरकारी अधिकारीले बताएका छन् ।
बंगलादेश स्वतन्त्रताको स्वर्ण जयन्ती तथा बंगलादेशका संस्थापक शेख मुजिबवुर रहमानको शतवार्षिकी जन्मजयन्तीको अवसरमा आयोजना हुने कार्यक्रममा सहभागी हुन राष्ट्रपति भण्डारीलाई बंगलादेशबाट निमन्त्रणा गरिएको थियो ।
गत वर्ष नै बंगलादेश भ्रमण गर्ने तय भए पनि कोरोना महामारीका कारण राष्ट्रपतिको भ्रमण रोकिएको थियो। कोभिड महामारी सुरु भएपछि नेपालका राष्ट्रप्रमुख (राष्ट्रपति) वा सरकार प्रमुख (प्रधानमन्त्री) बाट गरिने यो नै पहिलो विदेश भ्रमण हुनेछ।
बंगलादेशी राष्ट्रपति अब्दुल हमिद चार दिने नेपाल भ्रमणमा २०७६ कातिक २६ गते आएका थिए।
त्यसपछि बंगलादेशको निमन्त्रणामा नेपालबाट पनि राष्ट्रप्रमुख तहबाट नै बंगलादेश भ्रमण गर्ने योजना बनेको हो। तर कोरोना महामारीका कारण रोकिएको सो भ्रमणलाई आगामी चैत दोस्रो साता गर्ने गरी तय भएको हो।
बंगलादेश सरकारले रहमानको शतवार्षिकी जन्मजयन्ती र बंगलादेश स्वतन्त्रताको स्वर्ण जयन्ती चैत ४ देखि १३ सम्म मनाउने गरी १० दिने कार्यक्रम तयारी गरेको छ।
स्रोतका अनुसार राष्ट्रपति भण्डारी बंगलादेशको भ्रमणका लागि चैत ९ गते प्रस्थान गर्ने तय गरिएको छ।
राष्ट्रपति भण्डारीका प्रेस विज्ञ टिका ढकालले गतवर्ष बंगलादेशका राष्ट्रपति हमिदले नेपाल भ्रमण गरेपछि नेपालबाट पनि सोहि स्तरको भ्रमणका लागि गरिएका निमन्त्रणा र अभ्यासअनुसार दुई देशबीच परामर्श सुरु भएको हो।
© 2026 All right reserved to khabarcnter.com | Site By : Sobij
