टाइटानिकको भग्नावशेषमा पर्यटक बोकेको पनडुब्बी आइतबारदेखि एट्लान्टिक महासागरमा बेपत्ता छ । पनडुब्बीमा पाइलटसहित पाँच जना रहेका छन्, उनीहरुको व्यापक खोज अभियान चलिरहेको छ।

पनडुब्बी पर्यटकहरूलाई विश्वको सबैभन्दा प्रसिद्ध जहाज टाइटानिकको भग्नावशेष हेर्न गएको थियो । आइतबार डुबुल्की मारेको पनडुब्बीसँग सम्पर्कविहीन भएको र त्यसयता खोज्ने प्रयास भइरहेको छ । अमेरिकी कोस्ट गार्डका अनुसार गोताखोरीको एक घण्टा ४५ मिनेटपछि पनडुब्बीसँगको सम्पर्क टुटेको थियो । टुर कम्पनी ओशनगेट कम्पनीले पनडुब्बीको खोजीका लागि हरेक विकल्प प्रयोग गरिरहेको बताएको छ ।

आठ दिने यो पर्यटकीय यात्राको टिकटको मूल्य साढे दुई लाख डलर पर्छ । यस भ्रमणको क्रममा, पनडुब्बीले टाइटानिक जहाजको भग्नावशेष नजिकै समुद्रबाट ३ हजार ८ सय मिटर तल डुब्छ। अधिकारीहरूका अनुसार सरकारी निकायहरू, अमेरिकी र क्यानाडाली नौसेनाहरू र व्यावसायिक गहिरो समुद्री कम्पनीहरू खोज अभियानमा संलग्न छन्।

टाइटानिकको भग्नावशेष उत्तर अमेरिकाको महासागरको सबैभन्दा नजिक रहेको क्यानडाको न्यूफाउन्डल्याण्डको सेन्ट जोन्सबाट ७०० किलोमिटर टाढा एट्लान्टिक महासागरमा छ। यद्यपि यो पनडुब्बीको खोजी अभियान अमेरिकाको बोस्टनबाट चलिरहेको छ ।

हराएको पनडुब्बी ओशन गेट कम्पनीको टाइटन सबमर्सिबल हो जुन एक ट्रक जत्तिकै ठूलो छ र पाँच जना मानिस बोक्न सक्छ। सामान्यतया यो पनडुब्बीमा आपतकालीन अवस्थामा चार दिनसम्म अक्सिजन हुन्छ। सोमबार दिउँसो अमेरिकी कोस्ट गार्ड रियर एडमिरल जोन माउगरले पत्रकार सम्मेलनमा भने, “हामीले पनडुब्बी पत्ता लगाउन ७० घण्टादेखि ९६ घण्टासम्म समय लाग्ने अनुमान गरिरहेका छौं।”

यस पनडुब्बीको खोजीमा दुईवटा विमान र एउटा पनडुब्बी र सोनारले सुसज्जित फ्लोटिंग बार्ज खटाइएको उनले बताए । तर, जुन क्षेत्रमा यो खोजी अभियान चलिरहेको छ त्यो क्षेत्र धेरै टाढा भएकाले अप्रेसनमा कठिनाइ भइरहेको पनि उनले बताए । रियर एडमिरलले उद्धार कार्यमा संलग्न व्यक्तिहरूले यो कार्यलाई व्यक्तिगत रूपमा लिइरहेको र पनडुब्बीमा रहेका मानिसहरूलाई बचाउन हरसम्भव प्रयास गरिरहेको बताए।

बेलायतका अर्बपति व्यापारी हमिस हार्डिङको परिवारले उनी पनि यो पनडुब्बीमा सवार रहेको बताएका छन् । ५८ वर्षीय हार्डिङ पनि अन्वेषक हुन्। गत साताको अन्त्यमा हार्डिङले सामाजिक सञ्जालमा भनेका थिए, “म टाइटानिकको भग्नावशेषको अभियानको हिस्सा हुँ भन्ने कुरामा गर्व गर्छु।”

उनले यो पनि भने – ‘न्युफाउन्डल्याण्डमा विगत चार दशकको सबैभन्दा खराब जाडोका कारण २०२३ मा टाइटानिकमा जाने यो एकमात्र मानव मिसन हुन सक्छ।’ ओसन गेटले एक विज्ञप्तिमा भनेको छ -यसको पूर्ण ध्यान पनडुब्बीमा सवार व्यक्तिहरू र उनीहरूको परिवारमा केन्द्रित छ।’

पाकिस्तानका अर्बपति व्यापारी प्रिन्स दाउद र उनका छोरा सुलेमान पनि यो पनडुब्बीमा सवार छन् ।