२०८२ भाद्र २ गते सोमवार
२०८२ भाद्र २ गते सोमवार
अखिल नेपाल फुटबल संघ (एन्फा)को आगामी चार वर्षे कार्यकालका लागि पंकजविक्रम नेम्वाङ अध्यक्षमा निर्वाचित भएसँगै राष्ट्रिय फुटबल टिमका मुख्य प्रशिक्षक अब्दुल्लाह अल्मुताइरीले नेपाल नफर्किने संकेत देखाएका छन् ।
सामाजिक सञ्जाल इन्स्टाग्राम–स्टोरीमा प्रशिक्षक अल्मुताइरीले नेपाली फुटबलप्रति सुखद् भविष्यको कामना गर्दै आफू नफर्किने संकेत गरेका हुन् । यद्यपि उनले त्यो स्टोरी भने हटाएका छन् ।
हालै कुवेतमा एएफसी एसिया कप छनोट खेलेपछि अल्मुताइरी गृहनगर नै छन् । उनले टिम फर्कने समयमा चुनावको नतिजासँगै आफू फर्कने या नफर्कने तय हुने बताएका थिए ।
नेपाली राष्ट्रिय टिमको प्रशिक्षक हुँदै गर्दा प्रशिक्षक अल्मुताइरीले तत्कालीन वरिष्ठ उपाध्यक्ष नेम्वाङका कारण आफू पदबाट राजीनामा दिन एन्फा जान लागेको फेसबुकमा लेखेका थिए ।
तर उनले राजीनामा भने दिएका थिएनन् । नेपाललाई पहिलो पटक साफ च्याम्पियनसिपको फाइनलमा पुर्याए पनि उनले नेपाल नफर्किने अभिव्यक्ति दिएका थिए ।
एसिया कप छनोटको तेस्रो चरणका लागि आफ्नो देश कुवेत पुगेका अब्दुल्लाह तीन महिनाका लागि छुट्टीमा छन् । एन्फाको सोमबार भएको निर्वाचनबाट नेम्वाङ ४५ मतसहित अध्यक्ष पदमा निर्वाचित हुँदा ३९ मत पाएका कर्माछिरिङ शेर्पा पराजित भएका थिए ।
एन्फा कार्यसमितिमा पनि नेम्वाङ बहुमतमा छन् । थप राम्रो नतिजा ल्याउन नसक्नुमा अल्मुताइरीले नेम्वाङलाई दोष दिएका थिए । त्यस्तै उनले आफूलाई नेम्वाङले समय समयमा दबाबसमेत दिँदै आएको बताएका थिए ।
तर एन्फाका वरिष्ठ उपाध्यक्षमाथि एउटा प्रशिक्षकले आरोप लगाउँदा पनि तत्कालीन नेतृत्व चुप लागेर बसेको थियो । उल्टै छाडेर गएका प्रशिक्षकलाई फर्काएर ल्याउने काम भएको थियो ।
© 2025 All right reserved to khabarcnter.com | Site By : Sobij
