२०८२ भाद्र १९ गते बिहिवार
२०८२ भाद्र १९ गते बिहिवार
काठमाडौँ । श्रम, रोजगार तथा सामाजिक सुरक्षामन्त्री कृष्णकुमार श्रेष्ठ (किसान)ले ईपीएस अन्तर्गत रोजगारीका लागि कोरिया जाने पर्खाइमा रहेका नेपाली युवालाई छिटो लैजाने वातावरण बनाउन कोरियाली पक्षसँग आग्रह गरेका छन् ।
मन्त्री श्रेष्ठले मन्त्रालयमा सोमबार कोरियाको मानव संशाधन विकास बोर्ड (एचआरडी) कोरियाका नेपाल प्रतिनिधि किम उन डकसँग भेट गरी रोजगार अनुमति प्रणाली (इपिएस) अन्तर्गत भाषा र सीप परीक्षा उत्तीर्ण गरी दक्षिण कोरिया जाने पर्खाइमा ठूलो संख्यामा नेपाली युवाहरु रहेकोले छिटो लैजाने वातावरण बनाउन आग्रह गरेका हुन् ।
मन्त्री श्रेष्ठले व्यावसायिक उडान खुला गरी छिटो पठाउने प्रवन्ध गर्न कोरियाली पक्षसँग आग्रह गरेका छन् । अहिले महंगोमा चार्टर उडानमार्फत नेपाली कोरिया गइरहेका छन् । व्यावसायिक उडान खुला भएपछि कम शुल्कमा जान पाउनेछन् ।
एचआरडी कोरियाका नेपाल प्रतिनिधि डकले अहिले दक्षिण कोरियामा कोरोना भाइरस संक्रमण तीव्र रुपमा फैलिरहेको बताउँदै त्यसले समस्या भएको भनाइ राखेको बताइएको छ । व्यावसायिक उडान खुला गर्न आवश्यक प्रक्रिया शुरु गरिएको जानकारी दिँदै छिटो संचालन हुने बताइएको छ ।
यसअघि कोरोना संक्रमणको जोखिमका कारण माघको दोस्रो सातादेखि श्रमिक लैजान रोकिएकोमा हालै पुनः खुला गरिएको थियो । करिब सात हजार श्रमिक कोरिया जान छनोट भएकोमा कोरोना संक्रमणपछि ९ सय ८४ जना गइसकेका छन् ।
यसपछि मार्च १६ गते १ सय ७० जना जानेछन् । नेपालीहरु मेहनती र इमान्दार भएकोले कोरियाका रोजगारदाताको रोजाइमा पर्दै आएको बताइएको छ ।
© 2025 All right reserved to khabarcnter.com | Site By : Sobij
