२०८३ आश्विन ६ गते मंगलवार
२०८३ आश्विन ६ गते मंगलवार
.gif)
काठमाडौं । भारी हिमपात र निरन्तर वर्षाका कारण हिमाल आरोहणका लागि मनसुन प्रतिकूल भएपछि आरोही बीच बाटोबाटै धमाधम घर फर्किन थालेका छन्।
दुई सातासम्म पर्खिँदा पनि मौसमले साथ नदिएपछि आरोही धमाधम घर फर्किन थालेको मनास्लु हिमाल नजिक रहेको चुमनुब्री गाउँपालिका–१ सामागाउँका वडाध्यक्ष कर्मा छेवाङ लामाले जानकारी दिए।
मनास्लु क्षेत्रमा भइरहेको निरन्तर वर्षापछि त्यस वरपर पाँच फिट बाक्लो हिमपात भइरहेको उनले जानकारी दिए। “यस्तो त कहिल्यै भएको थिएन। खै के भएको हो, पानी र हिउँ परिरहेको छ”, वडाध्यक्ष लामाले भने, “झन् आठ गतेदेखि १२ गतेसम्म सरकारले सतर्क रहन भनेको छ। त्यही भएर आरोही धमाधम फर्किएका छन्।”
मनसुनमा सुधार आए पनि अब यो याममा फेरि फर्केर आरोहणमा जाने सम्भावना नरहेको उनको भनाइ छ।
विगतका वर्षमा त्यस क्षेत्रमा हतपत वर्षा नै नहुने भए पनि अत्यन्त न्यून हुने गरेकामा यस पटक भने दुई सातादेखि निरन्तर पानी परिरहेको स्थानीय व्यवसायी प्रबल लामाले बताए।
“बेस क्याम्पमा निरन्तर आउन थालेको सन् २०१४ देखि हो। यो बाह्र वर्षको अवधिमा यस्तो कहिल्यै देखिनँ”, उनले भने, “यो वर्ष त पानी ननस्टप परिरहेको छ। हिमपात पनि उस्तै छ। बेस क्याम्पमै तीन फिटसम्म हिउँ परेको छ। क्याम्प वान, क्याम्प टु, थ्रीतिर त सात–आठ फिट बाक्लो हिउँ परिसकेको छ।”
जोखिम देखेपछि आरोही फर्किएको उनको भनाइ छ।
बदलिएको मनसुनका कारण केही आरोही फर्किए पनि त्यस क्षेत्रमा अझै धेरै आरोही रहेको सामागाउँका होटल व्यवसायी मिङ्मार छिरिङ लामाले बताए।
“हिमाल चढ्न नसकेर त पोहोरतिर पनि फर्कन्थे। यसपालिचाहिँ अलि धेरै फर्केका छन्। मौसम प्रतिकूल भएर होला”, उनले भने, “अहिलेसम्म १० प्रतिशतजति फर्किए होलान्।”
विश्वमै ख्याति रहेको आठ हजार १६३ मिटर अग्लो मनास्लु आरोहण गर्न यस याममा करिब पाँच सय आरोहीले अनुमति लिएका थिए।
गत वर्ष ६७ देशका ४१ समूहका ३६६ जना पुरुष र १२७ जना महिला आरोहीले अनुमति लिएका थिए। त्यसबाट नेपाल सरकारलाई २२ करोड ४८ लाख १४ हजार रुपैयाँ राजस्व प्राप्त भएको थियो।
© 2026 All right reserved to khabarcnter.com | Site By : Sobij
