भुटानका दुई मन्त्रीले दिए राजीनामा

श्रावण २६, २०८३ मंगलवार

890

काठमाडौं । भुटानका गृह मामिला मन्त्री ल्योन्पो छेरिङ र ऊर्जा तथा प्राकृतिक स्रोत मन्त्री ल्योन्पो गेम छेरिङले पदबाट राजीनामा दिएका छन् । मंगलबार भुटानी प्रधानमन्त्री कार्यालयले विज्ञप्तिमार्फत यसबारे जानकारी गराएको हो ।

प्रधानमन्त्री कार्यालयका अनुसार, प्रधानमन्त्रीको सिफारिसमा राजा जिग्मे खेसर नाम्ग्याल वाङ्चुकले दुवै मन्त्रीको राजीनामा स्वीकृत गरिसकेका छन् । भुटानको संविधान तथा ल्हेङ्ग्ये झुङ्छोग ऐन, २०२१ अनुसार राजीनामा स्वीकृत गरिएको हो ।

गृह मामिला मन्त्री छेरिङले ‘व्यक्तिगत विषयका कारण उच्च नैतिकताका आधार’मा राजीनामा दिएको प्रधानमन्त्री कार्यालयले जनाएको छ ।

त्यस्तै, ऊर्जा तथा प्राकृतिक स्रोत मन्त्री गेम छेरिङले ‘उमेर र नयाँ पुस्तालाई नेतृत्वको उच्च जिम्मेवारीका लागि तयार पार्दै सहज नेतृत्व हस्तान्तरण गर्ने उद्देश्यले राजीनामा दिएको’ प्रधानमन्त्री कार्यलयको विज्ञप्तिमा उल्लेख छ ।

विज्ञप्तिमा दुवै मन्त्रीको सेवाप्रति आभार व्यक्त गर्दै गृह मामिला मन्त्री छेरिङको सार्वजनिक विश्वास कायम राख्ने नैतिक प्रतिबद्धता र गेम छेरिङको नयाँ पुस्ताको नेतृत्व विकासप्रतिको योगदानको प्रशंसा समेत गरिएको छ ।