२०८२ चैत्र ९ गते सोमवार
२०८२ चैत्र ९ गते सोमवार
काठमाडौं । सरकारले विदेशी पर्यटकका लागि नेपालका निषेधित क्षेत्रमा पदयात्रा गर्दा लाग्दै आएको ‘एकल पदयात्री’ सम्बन्धी कडा नियममा ठूलो हेरफेर गरेको छ । अध्यागमन विभागले चैत ८ गते विभागीय निर्णय गर्दै अबदेखि एक जना मात्रै विदेशी पदयात्रीले पनि निषेधित क्षेत्रमा जाने अनुमति पाउने व्यवस्था गरेको हो ।
यसअघि विभागले एकल पदयात्रीलाई निषेधित क्षेत्रको अनुमति नदिने व्यवस्था गरेका कारण पर्यटकले अनिवार्य रूपमा अर्को साझेदार खोज्नुपर्ने बाध्यता थियो ।
यसले गर्दा पदयात्रामा जान चाहने कतिपय पर्यटक प्रभावित भएका र पर्यटन प्रवर्द्धनमा असर परेको भन्दै ट्रेकिङ एजेन्सीज एशोसिएसन अफ नेपाल ९टान० लगायतका संस्थाहरूले गुनासो गर्दै आएका थिए । सोही गुनासोलाई सम्बोधन गर्दै विभागले एकल पदयात्रीका लागि पनि बाटो खोलेको हो ।
तर, एक्लै पदयात्रामा जान चाहने विदेशीका लागि विभागले केही कडा सर्तहरू पनि राखेको छ । अबदेखि एकल पदयात्रीले अनिवार्य रूपमा एजेन्सीमार्फत आवेदन दिनुपर्नेछ र उनीहरूसँग जाने ट्रेकिङ गाइड पनि अनिवार्य रूपमा तोकिएको हुनुपर्नेछ ।
विदेशी पर्यटकको सुरक्षा र निगरानीलाई ध्यान दिँदै विभागले एउटा गाइडले बढीमा ७ जना पदयात्रीलाई मात्र लैजान पाउने गरी नयाँ मापदण्ड पनि तय गरेको छ । एउटै समूहमा ठूलो संख्यामा पर्यटक हुँदा सुरक्षा र गतिविधि निगरानीमा समस्या हुने देखिएकाले यस्तो सीमा तोकिएको विभागका प्रवक्ता टीकाराम ढकालले जानकारी दिए ।
© 2026 All right reserved to khabarcnter.com | Site By : Sobij
