२०८२ भाद्र २ गते सोमवार
२०८२ भाद्र २ गते सोमवार
काठमाडौँ । टेलिभिजन कमेडी शो कमेडी दरबारमा पछिल्लो एपिसोडको सामाग्रीलाई लिएर कमेडियन विकास अर्याललाई धम्की आएको छ ।
कमेडी दरबारका लेखक समेत रहेका अर्यालले पछिल्लो माग्ने राजा चलचित्रको एपिसोडमा पूर्वप्रधानमन्त्री पुष्पकमल दाहाल प्रचण्डको नक्कल गर्दै प्रस्तुति दिएका थिए । सोही प्रस्तुतिका विषयलाई लिएर बारबार धम्कीपूर्ण फोन आएको उनले बताए ।
विभिन्न अपरिचित व्यक्तिहरूबाट फोन आइरहेको छ । आफ्नो परिचय खुलाउनुहुन्न तर भिडिओमा बोलिएका केही संवाद हटाउनुहोस् भन्नुहुन्छ ’ कमेडियन अर्यालले भने,मैले उहाँहरूलाई यो एक कमेडी कार्यक्रम हो र यसलाई कमेडिकै रूपमा लिनुहोस् भन्दै आग्रह गरिरहेको छु ।’
अर्यालका अनुसार कार्यक्रमको ४३ मिनेटमा बोलिएको 'मलाई समान्य नठान्नुस् के, म युद्ध मात्र लडेको होइन, चुनाव मात्र लडेको होइन, अस्ति ट्वाइलेटमा पनि लडेको मान्छे हो भन्ने कमेडी र ४४ मिनेटमा बोलिएको अर्को संवाद जसमा वर्षा सिवाकोटी पनि माओवादी जस्तै लाग्छ भन्दा कसरी भन्ने प्रश्नमा ’यस्तो लुक्समा हिँडेपछि १७ हजार कसो नढाल्लिन् र’ भन्ने संवादलाई लिएर आपत्ति जनाइएको हाे । साथै भिडिओमा ५ हजारको जिम्मा लिएको कुरालाई पनि फाेन मार्फत आपत्ति जनाइएको उनले बताए ।
कमेडियन अर्यालले हास्य व्यङ्ग्यलाई हास्य–व्यङ्ग्यकै रूपमा लिन आग्रह गरेका छन् । उनले यस विषयमा सामाजिक सञ्जालमा लेखेका छन्, ’कृपया हास्य–व्यङ्ग्यलाई हास्य–व्यङ्ग्यकै रूपमा लिनुहोस्। हाम्रो उद्देश्य केही क्षणका लागि भए पनि हँसाउनु हो, विवाद ल्याउनु होइन ।’
© 2025 All right reserved to khabarcnter.com | Site By : Sobij
