काठमाडौँ । खाद्य व्यवस्था तथा व्यापार कम्पनीले आजदेखि दसैंतिहार लक्षित सुपथ मूल्य पसल सञ्चालनमा ल्याएको छ । 

उद्योग वाणिज्य तथा आपूर्ति मन्त्री दामोदर भण्डारीले बिहिबार दिउँसो १ बजे थापाथली बिक्री केन्द्रबाट सुपथ मूल्य पसल औपचारिक रुपमा उद्घाटन गरेका हुन् । 

थापाथली बिक्री केन्द्रबाट उद्घाटन हुने सुपथ मूल्य पसल क्रमशः देशभरका ४२ जिल्लाका ६३ स्थानमा सञ्चालन गरिने कम्पनीले जनाएको छ । 

दसैंतिहार तथा छठको समयमा दैनिक उपभोग्य वस्तुको माग आपूर्ति र गुणस्तरियताका साथै मूल्यमा सहुँलियत दिन कम्पनीले सुपथ मूल्य पसल सञ्चालन लागिएको कम्पनीले जनाएको हो । 

चाडपर्व लक्षित सुपथ मूल्य पसल सञ्चालन गर्ने सन्दभर्मा गत भदौ २३ गते बसेको मन्त्रिपरिषद् स्तरिय बैठकले काठमाडौँका चार स्थानसहित देशैभरीबाट ६३ स्थानामा बिक्री केन्द्र स्थापना गरी सुपथ मूल्य पसल सञ्चालन गर्ने निर्णय गरेको थियो । यसका लागि सरकारले ३ करोड रुपैयाँ सहुलियत छुट बजेट समेत विनियोजन गरेको छ । 

प्रतिकेजी दस रुपैयाँ छुट

यसैबिच दसैँमा सरकारले १० रुपैयाँ छुटसहित एक हजार आठ सय खसीबोका र च्याङ्ग्रा बिक्रीवितरण गर्ने तयारी गरेको छ । कम्पनीले दसैँका लागि जिउँदो खसीबोका र च्याङ्ग्रामा प्रतिकिलो १० रुपैयाँ छुट दिने निर्णय गरेको हो । 

मकवानपुर, तुलसीपुर, मुस्ताङलगायत उपत्यका आसपासका क्षेत्रबाट ल्याइएका यी खसीबोका र च्याङ्ग्रा प्रादेशिक कार्यालय थापाथली, काठमाडौँ परिसरबाट खरिद गर्न सकिने कम्पनीको भनाइ छ ।

यस्तो छ छुट पाउने सूची 

विभिन्न प्रकारको चामल प्रतिकेजी ५ रुपैयाँ
विभिन्न प्रकारको दाल प्रतिकेजी ५ रुपैयाँ
विभिन्न प्रकारको तेल प्रतिलिटर ७ रुपैयाँ
विभिन्न प्रकारको गेडागुडी प्रतिकेजी ७ रुपैयाँ
विभिन्न प्रकारको पिठो, मैदा प्रतिकेजी ७ रुपैयाँ
चिउरा, चिनी, क्वाँटी प्रतिकेजी ७ रुपैयाँ
कर्णालीको सिमी(गेगागुडी प्रतिकेजी ७ रुपैयाँ
फापर दाना, चिनो, कागुनो, उवा जम्ली मार्सी प्रतिकेजी ७ रुपैयाँ
जिउँदो खसी–बोका, च्याङ्ग्रा प्रतिकेजी १० रुपैयाँ
डि।डि।सी। घ्यू प्रतिकेजी १० रुपैयाँ 

खसीबोका च्याङ्ग्रा कारोबार

खरिद लक्ष्यः खसीबोका १५०० वटा, च्याङ्ग्रा ३०० वटा गरी जम्मा १८०० वटा
खरिद गरिने स्थानहरूः मकवानपुर,  तुलसीपुर, मुस्ताङ लगायत उपत्यका आसपासका क्षेत्रहरू
बिक्री गरिने स्थानः प्रादेशिक कार्यालय, थापाथली, काठमाडौं परिसर
बिक्री वितरण गरिने लक्षित समयः घटस्थापनाको आसपासदेखि कम्तीमा नवमीको दिनसम्म